Ақмолада өрттен бес баланы құтқарған әке мен ұл марапатқа ұсынылды

Ақмола облысының Біржан сал ауданына қарасты Үлгі ауылының тұрғыны Ерлан Тоқсанбаев пен оның ұлы Мирастың өртке оранған үйден бес бірдей баланы құтқарып қалғаны туралы жазған болатынбыз. Батыл азамат жанып жатқан үйден  шығып үлгерген екі баланың артынан қалып қойған үш бірдей баланы да алып шыққан еді. Қайсарлық пен адамдықтың нағыз үлгісін көрсеткен әке мен баланың ерлігі бүгінде бүкіл өңірге өнеге болып отыр, – деп хабарлайды Aikyn.kz порталының тілшісі. 

Естеріңізге сала кетсек, оқиға жуырда Үлгі ауылындағы жеке тұрғын үйде болған. Облыстық төтенше жағдайлар департаментінің мәліметінше, өрт кезінде үй ішінде бес бала болған. Ал олардың анасы – көпбалалы жалғызбасты әйел сол сәтте жұмыста болған.

– Екі бала өз күшімен сыртқа шығып үлгерген. Алайда қалған үшеуін жалын мен қою түтін ішінен үйден сыртқа шыға алмай қалған. Сол кезде көмекке ауыл тұрғындары Ерлан мен Мирас Тоқсанбаевтар жүгіріп жеткен. Олар ойланбастан терезені сындырып, балаларды түтінге толы бөлмеден сыртқа алып шықты. Бұдан бөлек, Ерлан Тоқсанбаев үйді жарықтан ажыратып, екі газ баллонын далаға шығарып үлгерді. Батыл азамат үлкен жарылыстың алдын алды, – дейді облыстық төтенше жағдайлар департаментінің ресми өкілі Ерсайын Қойшыбаев.

Дегенмен үйде төрт газ баллоны бар болып шықты. Соның біреуі жарылып, үйге айтарлықтай зақым келген. Қалған баллонды оқиға орнына жеткен құтқарушылар дер кезінде сыртқа алып шыққан. Өрт толықтай сөндіріліп, зардап шеккендер болмады.

Біржан сал ауданының төтенше жағдайлар бөлімінің бастығы Денис Шелкоплясовтың айтуынша, өрттің шығуына себеп – қазандықтағы су айдайтын насостағы қысқа тұйықталуы себеп болған. Электр сымдары арқылы тараған жалын ағаш қабырғалар мен төбені тұтастай шарпып кеткен. Ал негізгі залалды жарылған газ баллоны келтірген.

Қазіргі таңда ерлік көрсеткен әке мен ұлды мемлекеттік наградаға ұсынып отыр.

Айта кетейік, Мирас Тоқсанбаев – азаматтық қорғау жоғары көпсалалы колледжінің 4-курс студенті. Болашақта кәсіби құтқарушы болуды армандайтын жас жігіт. Ерлан мен Мирастың батылдығы мен жанқиярлығы ел ішінде ізгілік пен бірліктің өлшемін тағы бір мәрте айқындап берді.

Абзал АЛПЫСБАЙҰЛЫ, Ақмола облысы