Екі інісін өрттен құтқарған 8 жасар Бейбарыс нені армандайтынын айтты

АЛМАТЫ, 29 мамыр – Sputnik. Батыс Қазақстан облысындағы Аралтөбе ауылының 8 жастағы тұрғыны Бейбарыс Тілекберген екі бауырын ажалдан аман алып қалды. Оқиғаның қалай болғанын Sputnik Қазақстан тілшісіне жеткіншектің өзі айтып берді.

Бейбарыстың үйі 16 ақпанда отқа оранған.

"Үйде екі ініммен қалған едім. Үлкен інім 2 жасар, ал кіші інім 8 айлық. Өрт болғанда мен анама хабарластым. Ол кісі келгенше бауырларымды алып, сыртқа шықтым. Анам тез келді. Қатты қорықтық", - дейді Бейбарыс Тілекберген.

Балақай әңгіме арасында нені армандайтынын айтып қалды.

"Арманым – үйлі болып, ата-анаммен, ата-әжеммен бақытты үмір сүру", - дейді ол.

Балалардың анасы сол күні жұмыста болған.

"Жұмысқа келгенім сол еді, жарты сағаттан кейін балам хабарласып: "Мама, үй өртеніп жатыр" деді. Содан жанұшыра үйге жүгірдім. Бейбарыс екі інісін көтеріп алып, кіреберісте отыр екен", – дейді анасы Айзада Зуханова.

Үш баланың үстінде футболка ғана болған. Балалар ақпанның қақаған аязында далаға шыға алмай, үйдің кіреберісін паналаған. Алайда өрт ол жаққа да шарпыған.

"Бейбарыс екі баламды көтеріп алып, көше жаққа шығып кетіпті. Аяқтарына үлкен адамның аяқ киімдерін іле салған. Келе салып өз киімдерімді кигіздім. Бейбарыс бірін көтеріп, бірін жетектеп далада тоңып тұр", - дейді Бейбарыстың анасы.

Бейбарыс өте мейірімді, тілалғыш, бауырмал, ақылды бала дейді анасы.

Өкінішке қарай, тілсіз жау үйді күлге айналдырып, Бейбарыс бауырларымен баспанасыз қалды. Қазіргі уақытта отбасы жалдамалы үйде тұрып жатыр.