АҚШ Әділет министрлігі құны 15 млрд долларды құрайтын биткоинді тәркіледі

Бруклиндегі (Нью-Йорк штаты) федералды прокуратура Prince Holding Group ірі желісінің жетекшісі, «Винсент» деген атпен белгілі Чэнь Чжиге Камбоджадағы криптовалюталық алаяқтыққа қатысы бар деген күдікпен айыптау қорытындысын шығарды. 

Осы уақытқа дейін бостандықта жүрген 37 жастағы Чжи мәжбүрлі еңбек алаяқтығын ұйымдастырды және бүкіл ел бойынша Prince Holding Group жұмысшыларына зорлық көрсетті деп айыпталып отыр. 

Ұрып-соғу суреттері Нью-Йорктің Шығыс округі бойынша АҚШ округтік сотында жарияланған дәлелдемелерге қосылды. 

Нью-Йорктің Шығыс округіндегі АҚШ адвокаты Джозеф Ночелланың хабарлауынша, компания ауқымды көлемдегі инвестициялық алаяқтық схемасының тасасында болған. 

Сот құжаттарына сәйкес, Чжи 30-дан астам елде жылжымайтын мүлік, қаржы және тұрмыстық қызмет көрсету салаларына инвестиция салған Prince Holding Group-ты «телефон фермаларының» ауқымды желісіне айналдырды. 

Онда адам саудасының құрбандары болған жұмысшылар интернетте жалған романтикалық қарым-қатынас, қаржылық көмек сұрау немесе табысты криптовалютаға тиімді инвестиция салу уәделерімен әлеуетті құрбандарды азғыру арқылы алаяқтық схемаларға қатысуға мәжбүр болды. Әділет министрлігінің мәліметінше, мұндай схемалар «sha zhu pan» (杀猪盘) немесе «pig butchering» («шошқа сою») деп аталады. 

Билік мәліметінше, Чжи компаниясы криптовалюта қаражатын ұрлау арқылы күніне 30 млн долларға дейін табыс тапты, ақша пайдаланушы бейресми кілттер мен қаражатты толық бақылай алатын хостингтік емес цифрлық әмияндар арқылы шығарылған.

Құны 15 млрд доллар 127 271 биткоин АҚШ-та сақталып отыр, олар бұрын Чжи басқаратын әмияндарда сақталған. 

- Бұл адам миллиондаған жазықсыз адам құрбаны болған мәжбүрлі еңбек, ақшаны жылыстату, инвестициялық схемалар және активтерді ұрлаумен айналысып, бірнеше құрлықта ауқымды қылмыстық желіні басқарды деп шамаланып отыр. Бүгін ФТР мен оның серіктестері тарихта қаржылық алаяқтық әрекеттеріне қарсы ең ірі операциялардың бірін жүргізді, - деді ФТР директоры Каш Патель. 

АҚШ Қаржы министрлігі Prince Holding Group тобын «трансұлттық қылмыстық ұйым» деп танып, Чэнь Чжи мен оның серіктестеріне қарсы санкциялар туралы жариялады.

Бұған дейін Трамптың Қытаймен сауда қақтығысы туралы мәлімдемесі криптовалюта нарығын құлатқанын жазған болатынбыз.