АҚШ әскери күштері Газада болмайды

- Мен Газадан CENTCOM басшылығымен Азаматтық-әскери ынтымақтастық орталығын құру жұмыстары туралы хабарлау үшін келдім. Орталық шиеленістен кейін жағдайды тұрақтандыру жұмыстарына қолдау көрсету үшін барлық қызметтердің жұмысын үйлестіреді. Бұл шарттардың барлығы Газада америкалық әскерлерсіз жүзеге асырылады,- делінген Купердің CENTCOM-ның Х парақшасындағы жазбасында.

Fox News телеарнасының тілшісі Дженнифер Гриффиннің мәліметтерінше, келісім бойынша әскердің шығарылып жатқанына көз жеткізу үшін Купермен бірге Израильдің Газадағы әскери базасына АҚШ президентінің арнайы елшісі Стивен Уиткофф та барған.

Екеуі де Израильге оралды, деп жазды ол Х парақшасында.

Осыған дейін Ақ үйдің баспасөз хатшысы Кэролайн Ливитт Газа секторындағы атысты тоқтату туралы келісім талаптарының орындалуын халықаралық миссия аясында Таяу Шығысқа жіберілген 200-ге дейінгі АҚШ әскері жүзеге асыратынын айтқан.

Reuters агенттігінің хабарлауынша, халықаралық миссия құрамына Мысыр, Қатар, Түркия әскерлері кірген, сондай-ақ Біріккен Араб Әмірліктерінің әскерлері де кіруі мүмкін.

Осыған дейін Газадағы атысты тоқтату келісімі күшіне енгені туралы жаздық.