АҚШ ғалымдары вирусқа, бактерияға және аллергияға қарсы әмбебап вакцина әзірледі

Стэнфорд университетінің командасы өздерінің «әмбебап вакцинасын» жануарларға сынақтан сәтті өткізіп, енді адамдар қатысатын клиникалық зерттеулерге дайындалып жатыр.

Ғалымдардың айтуынша, олардың әдісі адамзат екі ғасырдан астам уақыт бойы қолданып келген классикалық вакциналардан түбегейлі өзгеше. Сарапшылар бұл жұмыстың нәтижелерін әсерлі деп бағалап отыр, дегенмен жоба әлі де әзірлеу сатысында.

Айта кету керек, дәстүрлі вакциналар ағзаны белгілі бір вирусқа қарсы қорғануға «үйретеді»: қызылшаға, желшешекке немесе басқа ауруларға қарсы екпе иммунитетті тек бір ғана қоздырғышқа қарсы белсендіреді. Мұндай тәсіл XVIII ғасырдың соңынан бері қолданылады, оны алғаш рет британ дәрігері Эдвард Дженнер қолданған.

Жаңа әдіс мүлдем басқаша жұмыс істейді: ол иммундық жүйені «оқытпайды», керісінше иммундық жасушалар арасындағы табиғи ақпарат алмасу үдерісін имитациялайды.

Вакцина мұрын арқылы енгізіліп, өкпедегі ақ қан жасушаларын — макрофагтарды белсендіреді. Бұл жасушалар инфекциямен күресуге дайын күйде қалады. Нәтижесінде ағза тыныс жолдарына енуге тырысатын кез келген патогенге жауап бере алады.

Бұған дейін Аустралия балаларға арналған қатерлі ісікке қарсы вакцинаны сынауды әлемде бірінші болып бастайтыны хабарланған.