АҚШ та Түрік фестивалінде қазақ мәдениеті дәріптелді

АҚШ астанасындағы жыл сайынғы Түрік фестивалінде қазақ мәдениеті дәріптелді.

Биыл 23-рет өтіп жатқан ауқымды мерекеге Вашингтон аймағындағы қазақ диаспорасының өкілдері қатысып, төл мәдениетімізді насихаттады. Оған қоса қала мэрі Мюриэл Боузер биылғы қазанды Түрік мұрасының айы деп жариялап, түбі бір түркі халықтарына да құрмет көрсетті.

Дәл қазір Пенсильвания авенюде керемет той болып жатыр. Қазан айы - Вашингтонда түрік мәдениеті насихатталанатын ай. Қала мэрінің ұйымдастыруымен түбі бір түркі халықтары осылай фестиваль ұйымдастырып, би билеп, ән айтып, америкалықтарды және қала қонақтарын қуантып жатыр.

АҚШ парламенті ғимаратының алдындағы той-думан түріктің ән-күйімен шектелген жоқ. Анадолы мен Алтай арасындағы халықтар түгел өз өнерін ортаға салды. Ішінде осындағы қазақ диаспорасының өкілдері  де бар. Биші балалар сахнаға шыққанда, вашингтондық қауым көз алмай таң-тамаша болды.

Сара Сәдібек, биші:

- Қазақстанды көрсететініміз үшін қатты қуанып тұрмыз. Халқымызды басқа әлемге көрсеткіміз келеді. Адамдар енді «қалай әдемі билейді» деп айтады. Өте жақсы халық екен, билері де сондай әдемі деп жатады.

Жыл сайын 25 мыңнан астам адам  қатысатын шарада Солтүстік Америкадағы Қазақстан Мәдени-іскерлік ұйымының өкілдері де арнайы шатыр тігіп, қайырымдылық мақсатында дәстүрлі қолөнер бұйымдары мен киімдерді, елімізге қатысты кітаптарды жұрт назарына ұсынды. Біреулер жеке кітапханасын толықтырып жатса, енді біреулер тақияларға қызықты.  

Лима, фестиваль қонағы:

- Cахнадағы қазақ бишілерін көріп, олардың әшекейлеріне қызығып, осы шатырға арнайы келдім. Мына тақия қатты ұнап қалды. Құдды бір терең тарихпен байланыстырып тұрған сияқты. Және саудадан түскен қаражат қайырымдылыққа кетеді деген соң, ойланбастан сатып алдым.

Дариан, фестиваль қонағы:

- Америкалықтар Қазақстан мен Орталық Азия жайлы көбірек білсе екен деймін. Кезінде қазақтармен жұмыс істегендіктен солай айтып тұрмын. Жасырақ болғанымда жұбайымды алып Қазақстанға саяхаттап барар едім. Қазір қолымнан келетіні осындай фестивальдер ғана.

Ердәулет Рахматулла, фестиваль қонағы:                                 

- Вашингтонға бірінші рет келуім. Сол себепті мұндай фестиваль өтетінін білмедім. Біздің түркі бауырлас халықтарымыздың мерекесі ретінде қабылдап келіп отырмын. Өте қуаныштымын. Қазір ғана ұлттық биді билеп бітіріп келдік. Меніңше осындай түркі мемлекеттерінің мейрамдары жиі болса, жақсы болушы еді.

Ұйымдастырушылар жүздеген ерікті тартып, қазақ, түрік, әзербайжан, өзбек, ұйғыр, татар асханасының тағамдарын даярлады. Осы шара арқылы түрік-америка достығын ғана емес, түркі халықтарының ықпалын арттырып, ынтымағын берік ете түсуді көздейміз дейді.

Севтап Шреффлер, ұйымдастырушы:

- Осындағы түркі халықтарымен бағзы заманнан бері біте қайнасып, бір өркениет болып, жасап келеміз. Айырмашылығымыздан ұқсастығымыз көп. Сол қырынан да америкалықтарға танытқымыз келіп, мүмкіндігінше бауырлас ұлттардың басын қосып жатырмыз.

Күндізгі 11-де басталған мерекелік көңіл күй сағат 18:00-ге таяу бір-ақ тарқады. АҚШ астанасында мұндай ауқымдағы фестивальді ұйымдастыратын этникалық бірлестіктер санаулы ғана. Жапон, үнді, грек, эфиопия, қытай, италия және оңтүстік-шығыс Азия халықтарымен бірге түрік диаспорасы да осы қатардағы белсенді топтардың бірі.

Авторлары: Ердана Ержанұлы, Эндрю Фанг