Ақшадан бас тарттым : 3 баланы құтқарған балықшы оқиғаның қалай болғанын айтты

АЛМАТЫ, 24 қараша – Sputnik. Көкшетауда мұз астына түсіп кеткен үш бірдей баланы құтқарып қалған Сергей Цупкин Sputnik Қазақстан тілшісіне оқиғаның қалай болғанын айтып берді.

Балық аулап бейғам келе жатқан Сергей Цупкин үш бірдей баланы ажалдан арашалап қалды.

"Балалар өзеннің үстінде жүгіріп ойнап жүр екен. Мұз жұқа, жазым болар ма екен деп ойлағаным сол еді, біреуі мұз астына түсіп кетті. Қалған екі бала құтқармақ болды ма білмедім, олар да суға түсіп кетті", - дейді Сергей Цупкин.

Шамамен 50 метр қашықтықта болған Сергей бірден құтқаруға ұмтылады.

Өткен жылы бұл өзенде сел жүрген. Содан кейін арнасы терең етіп қазылып, көпір маңына плиталар қойылған. Оқиға сол жерде болған.

"Менің қолымда телефон жоқ, үйге тастап кетіп едім. Тіпті телефон болғанның өзінде біреуге хабарласып көмек күтіп тұру мүмкін емес, тез әрекет етуім керек болды. Өзенге түстім. Су деңгейі биік, тіпті менің өзімді ағызып әкететіндей болды", - дейді Сергей.

Балаларға жету үшін ол мұзды сындыруға мәжбүр болған.

"Өзен үлкен емес, ені тар. Тек су өте суық болды. Біреуін алып шыққанда, ар жақтан бір жігіт жүгіріп келді. Мен баланы оған беріп, қалған екі балаға қарай қайта жүрдім. Арғы жақтан бір қыз жедел жәрдем шақырды", - дейді ол.

Сергейдің айтуынша, үрейі ұшқан балалар сәл болмағанда бірін-бірі суға батырып жіберер еді.

"Екі кішкентай бала бірін-бірі ұстап алған. Екінші рет суға кіргенімде екеуін бірден алып шықтым", - дейді Сергей Цупкин.

Балалардың жасы 7,8,9 жаста. Оларды көтерген бойы жақын маңдағы жиҺаз дүкеніне кіргізіп, су киімдерін шешіп, көмектескен.

"Бұны ерлік деп санамаймын. Менің орнымда кез келген адам осылай істер еді. Кейіннен үш баланың ата-аналары келіп, ақшалай сыйлық ұсынды, мен бас тарттым. Сосын ұлыма хоккей спортына коньки мен таяғын алып берді", - дейді үш баланы бірдей аман алып қалған көкшетаулық тұрғын Сергеу Цупкин.

Сергей Цупкин қазіргі уақытта жұмыссыз. Еңбегімді айтып бұлдамаймын, марапатқа ұсыну да артық дейді ол. Тіпті төтенше жағдайлар мамандарының өзін қалай тауып алғанына аң-таң.

Сергей тек суға батып кете жаздаған балалардың бірінің осы оқиғадан кейін жүзуді үйрену үшін үйірмеге қатысатынын айтқанына қуанған.