Ақшаны жуса не болады? Ұлттық банк ерекше эксперимент көрсетті

Егер банкнотаны абайсызда киіммен бірге жуып жіберсеңіз, жаңбырдың астында қалса немесе әмиянда ұзақ уақыт жүрсе, оған не болады? Қазақстан Ұлттық банкі ақша айналымға шықпас бұрын қандай сынақтан өтетінін айтып берді, деп хабарлайды Tengrinews.kz тілшісі.

Атап айтқанда, әрбір банкнота бірқатар сынақтан өтеді.

Кезеңдердің бірі – ластануға төзімділігін тексеру.

Сынақ үшін мамандар банкноталардың күнделікті айналымы кезінде пайда болатын ластануды имитациялайтын арнайы қоспаны пайдаланады.

Тестілеу алдында сарапшылар қағаздың негізгі сипаттамаларын анықтайды, содан кейін үлгілерді ақша белгілерін пайдалану жағдайларын қайталайтын арнайы қондырғыға орналастырады. Сынақ аяқталғаннан кейін олар қайтадан өлшеулер жүргізіп, алынған нәтижелерді бағалайды.

"Егер сіз банкнотаны абайсызда қалтаңызда қалдырып, кір жуғыш машинаға салып жіберсеңіз де, бұл біз үшін тосын жағдай емес – мұндай сценарий тест сынақтарында алдын ала қарастырылған. Сынақ кезінде үлгілерге су, жуғыш заттар, механикалық үйкеліс және тұрмыстық пайдалану жағдайларына жақын температуралар әсер етеді", – деп хабарлады Ұлттық банк.

Сынақтан кейін мамандар банкноталардың өз қасиеттері мен қорғаныш элементтерін сақтап қалғанын тексереді.

Посмотреть эту публикацию в Instagram

Публикация от Қазақстан Ұлттық Банкі (@national_bank_of_kazakhstan)

Бұдан бөлек, банкноталардың беріктігі, иілімділігі және тозуға төзімділігі тексеріледі. Ұлттық банк мұндай сынақтар заманауи технологияларды енгізуге және айналым барысында өз қасиеттері мен жоғары қорғаныс деңгейін ұзақ сақтайтын ақша белгілерін шығаруға мүмкіндік беретінін атап өтті.

Заманауи банкноталар көптеген сынақтан өткеніне қарамастан, оларды ұқыпты ұстау қажет. Купюраларды қатты бүктемеуге, жыртпауға, үстіне жазу жазбауға немесе ылғал жерде сақтамауға кеңес беріледі. Ұқыпты қолдану банкноталардың қызмет ету мерзімін ұзартуға және олардың қорғаныш элементтерін сақтауға көмектеседі.

Бұған дейін 2012 жылғы үлгідегі номиналы 2000 теңгелік банкноталардың төлемге қабылданбайтыны хабарланған болатын. Оларды қайда айырбастауға болатынын мына жерден оқыңыз.

Тағы оқыңыз: 2000 теңгелік банкнот енді жарамсыз: оны қайда айырбастауға болады?

Google News арқылы жаңалықтарымызды қадағалаңыз