Ақтөбеде тергеу изоляторына телефонды донерге жасырып өткізбек болған

Оқиға 2026 жылғы 15 қазанда Ақтөбе облыстық Қылмыстық-атқару жүйесі департаментіне қарасты №70 тергеу изоляторында болған. "Қадағалау" режимдік-профилактикалық іс-шарасы кезінде мекеменің режимдік және жедел бөлім қызметкерлері айыпталушыға арналған сәлемдемені тексерген.

Тексеру барысында донердің ішінен қара түсті Nokia телефоны табылған. Сәлемдеме ҚР Қылмыстық кодексінің 188-бабының 1-бөлігі бойынша ісі қаралып жатқан азаматқа арналған.

Телефон тәркіленіп, оны мекемеге өткізбек болған 31 жастағы азамат ұсталды. Оған қатысты ҚР Әкімшілік құқық бұзушылық туралы кодексінің 481-бабының 1-бөлігі бойынша әкімшілік хаттама толтырылып, материалдар сотқа жолданды.

Ақтөбе облыстық Қылмыстық-атқару жүйесі департаменті мекемелерде режим талаптарының сақталуын қамтамасыз ету және тыйым салынған заттардың ішке өтуіне жол бермеу жұмыстары тұрақты жүргізілетінін мәлімдеді.

Департамент азаматтарды заң талаптарын қатаң сақтауға шақырып, қылмыстық-атқару жүйесі мекемелеріне тыйым салынған заттарды өткізуге әрекет жасағандар заңға сәйкес жауапқа тартылатынын ескертті.