Әскер шыңдаған достық: Ұлттық ұланның әскери бөлімінде колледжде бірге оқыған 10 студент қызмет етуде

2026 жылғы көктемгі әскерге шақыру науқаны барысында ҚР ІІМ Ұлттық ұланында ерекше оқиға болды. Колледждің он түлегі бір мезетте Тараз қаласында орналасқан 5513 әскери бөліміне азаматтық борышын өтеуге шақырылды. Ең қызығы – олардың барлығы бір батальон мен бір ротада бірге қызмет өткеруде,  – деп хабарлайды Aikyn.kz.
Осыдан азғана уақыт бұрын бұл жастарды Оңтүстік Қазақстан гуманитарлық-экономикалық колледжінің дәрісханалары, «Дене шынықтыру және спорт» мамандығы бойынша білім алу, бірлескен жаттығулар мен емтиханға дайындық біріктірген еді. Енді олардың күнделікті тыныс-тіршілігі саптық алаңда, жас жауынгер курсындағы оқу сыныптарында өтуде. Ұлттық ұлан қатарында Отан алдындағы борышын өтеу туралы шешімді де олар бірге қабылдаған.
Болашақ сарбаздардың таңдауына колледжде өткен кәсіби бағдар беру кездесуі ерекше ықпал етті. Студенттер алдында қызметтік-жауынгерлік міндеттерді орындау кезінде ерлігімен танылып, мемлекеттік наградалармен марапатталған Ұлттық ұлан офицері, майор Ербол Отарбаев сөз сөйледі. Оның әскери қызмет туралы әсерлі әңгімесі мен өнегесі жастардың жүрегіне жол тауып, саналы таңдау жасауына себеп болды.
Бүгінде әскер өмірі олардың достығын жаңа белеске көтерді. Олар әскери істің қыр-сырын бірге меңгеріп, бір-біріне қолдау көрсетіп, қызмет талаптарына тез бейімделуге көмектесіп келеді.

– Бір-бірімізге үнемі түсіндіріп, демеп, қолдау білдіреміз. Егер арамызда ине-жіп ұстап көрмегендер болса, әскери киімді қалай тігу керектігін үйретеміз. Әрдайым ақылымызды айтып, көмектесеміз. Біздің достығымыз студенттік жылдары сыннан өтсе, енді оны әскер өмірі шыңдап жатыр, – дейді қатардағы жауынгер Дидарбек Үсенов.

Жастардың спорттық дайындығы әскери сабақтар барысында да өз пайдасын тигізіп жатыр. Дене шынықтыру факультетінің түлектері өзге қаруластарымен тәжірибелерімен бөлісіп, жауынгерлік даярлық сабақтарында жаттығуларды дұрыс орындауға көмектеседі. Дене жүктемесін көтере алмай жатқан қызметтестеріне қолдау көрсетіп, жігерлендіреді.
Мерзімді әскери қызметін абыроймен аяқтағаннан кейін ұландықтар жоғары оқу орындарына түсуге арналған білім беру грантын жеңіп алуға мүмкіндік алады. Ал бір оқу орнында білім алып, кейін бір әскери бөлімде бірге қызмет етуге бел буған он достың оқиғасы биылғы көктемгі шақырылымының ең ерекше әрі тағылымды мысалдарының біріне айналды.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.