Әскердің қауіпсіздігіне көз жеткізбейінше Украинаға жібермейміз Ұлыбритания маршалы

АСТАНА, 13 қаңтар – Sputnik. Лондон өз әскерінің қауіпсіздігіне толық көз жеткізбейінше оларды Украинаға жібермейді. Бұл туралы Ұлыбритания Қарулы күштері бас штабының бастығы, авиацияның бас маршалы Ричард Найтон парламент мүшелері алдында сөйлеген сөзінде мәлімдеді, деп хабарлады Telegraph газеті.

"Біз өз қарулы күштеріміздің қауіпсіздігіне сенімді болмайынша оларды ешқайда жібермейміз. Ал мен "ниеттестер коалициясының" жоспарлау жұмысына тікелей қатысып отырған адам ретінде қойылған міндеттерді орындауға қажетті құралдарымыз бар екеніне сенімдімін. Қосымша қаржыландыру тәуекелді азайтады", — деді ол.

Парламент мүшелері Найтоннан "соғыс аяқталған жағдайда британ сарбаздары Украинада өз міндетін орындау үшін жеткілікті ресурспен қамтамасыз етіліп, қауіпсіз болады деп санайсыз ба?" деп сұрады.

Маршал оперативтік жағдайда қауіп-қатер мүлде болмайды деп айта алмайтынын мойындады.

Бұған дейін Ұлыбритания премьер-министрі Кир Стармер Парижде өткен кездесуде "ниеттестер коалициясы" елдерінің басшылары бейбіт келісім жасалған жағдайда Украинада әскер орналастыру туралы декларацияға қол қойғанын айтқан еді. Оның сөзінше, қақтығыс тоқтағаннан кейін Ұлыбритания мен Франция Украина аумағында әскери базалар құрып, Украина Қарулы күштері үшін техника қоймаларын салмақ.