Асқабақтан қайық жасаған АҚШ фермері

АҚШ-тың Орегон штатындағы қарапайым фермер Гэри Кристенсен ерекше еңбегімен әлем назарын өзіне тағы да аударды. Ол биыл алып асқабақтан жасалған қайықпен Колумбия өзенін бойлай 94,26 шақырым жүзіп өтіп, «асқабақ-қайықпен ең ұзақ жүзу» номинациясы бойынша жаңа әлемдік рекорд орнатты, деп хабарлайды Egemen.kz.

Гэри бұл жетістікке жету үшін бірнеше ай бойы еңбектенген. Әуелде оған мұндай идея 2023 жылы келіпті. Сол жылы Punky Loafster деп атаған алғашқы асқабақ-қайығымен 73,5 шақырымды жүзіп өткен еді. Алайда өзінің нәтижесіне көңілі толмаған фермер жаңа сынаққа дайындықты ерте көктемнен бастапты. Бұл жолы ол  «кемесін» Marchflower деп атады. Атауының астарында символдық мән бар – әйгілі «Mayflower» кемесіне құрмет және асқабақтың наурыз айында тозаңдандырылып, мамырда жиналғанына ишара.

Кристенсеннің айтуынша, жаңа қайық бұрынғысынан 136 келіге жеңіл болған. Бірақ жеңіл салмақ оған өз рекордын айтарлықтай жақсартуға мүмкіндік берді.

«Өткен жылы өзеннің мінезін, ағысын, толқын бағытын бақылауды, ескекті дұрыс пайдалануды үйрендім. Ал биыл сол тәжірибені толық қолданып, жаңа тәсілдерді меңгердім. Ең қиыны, қыс бойы алып асқабақ өсіру болды. Себебі мұндай көлемге жету үшін айлап күтім қажет», дейді ол.

Фермердің айтуынша, ол рекордтық сапарға таңғы уақытта шыққан. Алғашқы сағаттарда ауа райы мен ағыс қолайлы болғанымен, кешке қарай жел күшейіп, қайықты бағытта ұстау қиындаған. Соған қарамастан, Гэри 20 сағаттан астам уақыт бойы тоқтамай ескек есіп, мақсатына жеткен.

Әлемдік рекорд Guinness World Records ұйымы тарапынан ресми түрде тіркелді. Бұл – Гэри Кристенсеннің екінші рекорды. Бірақ фермер мұнымен шектелмек емес. «Мен өзімді тоқтатпаймын. Келесі жылы жаңа мақсат қойдым, яғни жүзу қашықтығын 100 шақырымнан асырсам деген ойым бар. Асқабақ мен үшін жай көкөніс емес, табандылық пен еңбектің символы», дейді ол.

Асқабақтан қайық жасау АҚШ-та сирек болса да, кең тараған дәстүрдің біріне айналған. Кейбір штаттарда тіпті «асқабақ флотилиясы» деп аталатын жарыстар өтеді. Мұндай сайыстарда қатысушылар өздері өсірген алып асқабақтарды ойып, суға түсіріп, ескекпен жүзу арқылы бақ сынасады.

Гэри Кристенсеннің жетістігі сол дәстүрдің шегінен шығып, оны әлемдік деңгейге көтерді. Оның «Marchflower» атты қайығы бүгінде асқабақтан жасалған ең ұзақ жүзудің символына айналып отыр.