Астана автобусындағы бейнежазба: карб иіскеген ер адам жұртты шошытты

видеодан скриншот

Астананың қоғамдық көлігінен түсірілген видео әлеуметтік желілерде қызу талқыланып жатыр. Кадрларда көк күртеше киген ер адамның аузы мен мұрнына пакет апарғаны көрінеді. Желі қолданушылары оның көлік карбюраторларын тазартуға арналған, қысқа уақытқа масайту әсерін беретін «карб» деп аталатын құралдың буын жұтып отырғанын болжады.

Видео Threads әлеуметтік желісінде жарияланған. Жазба авторы оған қысқа ғана «Астана таңғалдырады» деген жазба қалдырған.

Кадрларда көк күртеше мен сұр бас киім киген ер адам автобустың есік жанындағы орындығында отырып, ара-тұра пакетке бетін жақындатады.

«Қалтасынан карб көрініп тұр»

Пікір қалдырғандардың көбі ер адам көлік карбюраторын тазартуға арналған «карб» деп аталатын құралды пайдаланып отырған болуы мүмкін деп топшылады.

«Базар жоқ, ауру қаласында карб жатырғыз, ауру деп сонда автобуста солай істеп отырғаны дұрыс па?» – деп пікір білдірген қолданушылардың бірі мұндай әрекеттің қоғамдық көлікте жасалуына наразылық танытты.

Тағы бір қолданушы: «Қалтасынан карб шығып тұр, соны иіскеп отыр», – деп жазды.

Кейбір пікір қалдырушылар бұл адамды бұған дейін де қалалық автобустардан көргендерін айтты.

Бір қолданушы оны №17 автобустан кездестіргенін жазса, енді бірі №24 бағытты атады.

Сонымен бірге жарияланған кадрлардан ер адамның жеке басын, жасын, нақты қай бағыттағы автобуста отырғанын және қолындағы заттың ішіндегісін анықтау мүмкін емес.

«Карб» деген не және оны не үшін иіскейді?

«Карб» немесе «карбик» – автокөлік карбюраторларын тазартуға арналған құралдың ауызекі атауы.

Мұндай аэрозольдер мен сұйықтықтар қозғалтқыш бөлшектеріндегі ластануды кетіру үшін қолданылады. Алайда кейбір адамдар олардың құрамындағы ұшпа химиялық заттарды қысқа уақытқа масаю мақсатында әдейі иіскейді.

Мұндай әрекет токсикоманияға жатады.

Өндірушіге байланысты карбюратор тазартқыштардың құрамында ацетон, толуол, түрлі көмірсутектер және басқа да еріткіштер болуы мүмкін.

Бұл заттар тыныс алу арқылы ағзаға тез еніп, орталық жүйке жүйесіне әсер етеді.

«Карб» несімен қауіпті?

Мамандар улы буларды жұту бас айналуға, қозғалыс үйлесімінің бұзылуына, естен тануға және улануға әкелуі мүмкін екенін ескертеді.

Қатты әсер еткен жағдайда жүрек ырғағының бұзылуы, жүйке жүйесінің зақымдануы, есінен тану, тіпті өлім жағдайы болуы ықтимал.

Әсіресе мұндай заттарды тұрақты түрде қолдану қауіпті. Бұл тәуелділіктің қалыптасуына және денсаулықтың созылмалы бұзылуына әкелуі мүмкін.

2025 жылғы қарашада Қазақстан Республикасы Оқу-ағарту министрлігі Балалардың құқықтарын қорғау комитетінің төрағасы Насымжан Оспанова ата-аналар мен педагогтердің назарын жасөспірімдер арасында «күлкі газын» және карбюратор тазартатын сұйықтықтарды иіскеу сияқты қауіпті әрекеттердің таралуына аударған болатын.

Сол кезде ведомство мұндай тәжірибелер кәмелетке толмағандардың денсаулығына ауыр зардап әкелуі мүмкін екенін ескерткен.

Қазақстанда бұл мәселе қаншалықты кең таралған?

Денсаулық сақтау министрлігінің 2025 жылғы қыркүйекте жариялаған мәліметіне сәйкес, елде токсикомания жағдайлары әлі де кездеседі, алайда жаппай сипат алған жоқ.

2025 жылдың алғашқы жеті айында ұшпа еріткіштерді қолдануға байланысты психикалық және мінез-құлықтық бұзылулардың 132 жағдайы тіркелген. Оның 10-ы 17 жасқа дейінгі балалар мен жасөспірімдерге тиесілі.

Сонымен қатар мамандар кәмелетке толмағандар арасында карбюратор тазартқыштарды қолданудың жекелеген жағдайлары да тіркелетінін атап өткен.

Астанадан тараған талқыланып жатқан видео тұрмыстық және автокөлік химиясын қауіпті мақсатта пайдалану мәселесіне тағы да назар аудартты.

Бүгін, 15:50