Ақтауда жылу тапшылығын жою үшін 48 млрд теңгеге жаңа қазандық салынады

АСТАНА, 30 қазан – Sputnik. Ақтау қаласында жылу қуатының тапшылығын жою үшін 48 млрд теңгеге алты шағын ауданға қызмет көрсететін жаңа қазандық салу жоспарланып отыр. Бұл туралы премьер-министрдің орынбасары Қанат Бозымбаевтың Маңғыстау облысына жұмыс сапары барысында белгілі болды.

Вице-премьер өңірдегі жылу, су және электрмен жабдықтау нысандарын аралап, коммуналдық инфрақұрылымды жаңғырту жұмыстарымен танысты.

Жаңа қазандық Ақтаудың өсіп келе жатқан жылу қажеттілігін қамтамасыз етуге бағытталған. Қазір қаладағы жылу қуатының тапшылығы сағатына 130 Гкал-ға жеткен.

Жылу желілерінің 65%-ы тозған

Ақтаудағы коммуналдық инфрақұрылымның жағдайы да күрделі. "Каспий жылу, су арнасы" кәсіпорнының мәліметінше, жылу желілерінің тозу деңгейі 65%-ды құрайды. Ал су құбыры желілерінің 58%-ы, кәріз желілерінің 69%-ы тозған.

"Осыған байланысты "Энергетикалық және коммуналдық секторларды жаңғырту" ұлттық жобасы аясында Ақтаудың 4 және 5-шағын аудандарында 41 шақырымнан астам жылу желісін қайта жаңарту көзделген", - деп жазылған үкіметтің баспасөз қызметі таратқан ақпаратта.

Жобаның құны – шамамен 21,8 млрд теңге. Құрылыс-монтаж жұмыстарын 2027 жылы аяқтау жоспарланып отыр. Бұдан бөлек, инженерлік желілердің жұмысын 63 бақылау нүктесі арқылы қадағалайтын цифрлық диспетчерлеу жүйесі енгізіліп жатыр.

Каспийдің тартылуы МАЭК жұмысына әсер етуі мүмкін

Өңірдегі тағы бір өзекті мәселе – Каспий теңізі деңгейінің төмендеуі. Бұл Маңғыстау атом энергетикалық комбинатының (МАЭК) тұрақты жұмысына қауіп төндіріп отыр.

Осыған байланысты ЖЭО-1 және ЖЭО-2-нің су қабылдау арналары тереңдетіліп, ұзартылып жатыр. Жобалардың мақсаты – комбинатқа өндірістік қажеттіліктер үшін теңіз суын үздіксіз жеткізу.

Сонымен қатар Қанат Бозымбаев "Каспий" су тұщыту зауытының жұмысымен танысты. 2025 жылы жүргізілген кеңейту жұмыстарының нәтижесінде кәсіпорынның өндірістік қуаты тәулігіне 40 мың текше метрге дейін артқан.

Зауыт Ақтау қаласының жоғарғы шағын аудандарын, сондай-ақ Мұнайлы және Қарақия аудандарының елді мекендерін ауыз сумен қамтамасыз етеді.

Электр желілерін жаңартуға 63,5 млрд теңге бағытталған

Жұмыс сапары барысында электрмен жабдықтау инфрақұрылымын жаңғырту мәселесі де қаралды.

"Маңғыстау өңірлік электртораптық компаниясы" АҚ 2012–2026 жылдары электр желілерін жаңартуға 63,5 млрд теңге бағыттаған. Осы кезеңде 60 қосалқы станса жаңғыртылып, бес жаңа станса салынған. Сондай-ақ 273 шақырым электр жеткізу желісі тартылған.

Ұлттық жоба аясында электр желілерін қайта жаңартуға арналған тағы екі жоба келісілген.