Астана халықаралық қаржы орталығы дауларды шешу үшін ЖИ қолданады

«Астана» халықаралық қаржы орталығының Соты мен Халықаралық арбитраж орталығы дауларды шешуде жасанды интеллект технологияларын қолдана бастады.

Бұл туралы Лондондағы жыл қорытындысына арналған салтанатты қабылдауда айтылды. Күрделі даулармен айналысатын заңгерлер жасанды интеллектіні қазірдің өзінде белсенді қолданып келеді: цифрлық шешімдер процессуалдық құжаттар мен дәлелдеме базасын жылдамырақ әрі дәлірек дайындауға мүмкіндік береді. Сот пен Төрелік орталығы бұдан бөлек нейрожелі технологияларына негізделген транскрипция жүйесін әзірледі. Әлемде алғаш рет сот отырыстары кезінде нақты уақыт режимінде сөйлеушінің сөзі ағылшын және орыс тілдерінде 100%-ға жуық дәлдікпен экранға шығып отырады. Тағы бір маңызды бастама — білім орталығы базасында қазақстандық жастардың арасынан болашақ судьяларды, төрешілерді, медиаторларды және заңгерлерді даярлау бағдарламасы іске қосылмақ. Айта кету керек, орталық ашылғалы 7 жылда мекемеге 36 елдің тараптары жүгінген. Олардың шағымдары 100% қанағаттандырылып отыр. 

Кристофер Кэмпбелл-Холт, «АСТАНА» ХҚО соты мен хто тіркеушісі және аппарат басшысы:

- Инвесторлар бізге «Астана» халықаралық қаржы орталығының Соты мен Халықаралық арбитраж орталығының Қазақстанда жұмыс істеуі - 100 пайыз шешуші фактор екенін айтады. Елге инвестиция салуға себеп көп, бірақ жүздеген миллион немесе миллиард доллар туралы әңгіме қозғалғанда дәл осы сот пен арбитраж орталығының маңыздылығы еселенеді.

Джеймс Пикеринг, Enterprise Chambers адвокаттар палатасының басшысы:

- Мен үшін бұл өте шабыттандыратын жоба. Жалпы құқық жүйесіне негізделген басқа да офшорлық юрисдикциялар бар: Дубайда, Әбу-Дабиде, Қатарда. Бірақ Қазақстанның мәдени контексті мен географиялық орналасуын ескерсек, Сот пен Арбитраж орталығының әлеуеті, менің ойымша, арта түседі.