Астана тұрғыны бұрынғы әйелінің жұмысына келіп, оны өртеп жіберемін деп қорқытты

Астанада ер адам бұрын бірге тұрған әйелін өртеп жіберемін деп қорқытып, үстіне жанғыш сұйықтық шашқан. Іс сотқа дейін жетті, деп хабарлайды Tengrinews.kz қалалық прокуратураға сілтеме жасап.

Қадағалау органының мәліметінше, ер адам бұрын бірге тұрған әйелін қызғанып, оның жұмыс орнына жанғыш сұйықтық құйылған бөтелкемен барған.

"Әйелмен қарым-қатынасын қалпына келтіру мақсатында ол жәбірленушіні өртеп жіберемін деп қорқытқан. Кейін оның үстіне жанғыш сұйықтық құйып, өміріне нақты қауіп төндірген", - деп хабарлады прокуратура.

Сот отырысында мемлекеттік айыптаушы сотталушының кінәсін дәлелдеді. Қызғаншақ ер адамға 60 сағат қоғамдық жұмыс түріндегі жаза тағайындалып, оның мінез-құлқына бірқатар ерекше талап белгіленді, соның ішінде жәбірленушіге жақындауға тыйым салынды. Үкім заңды күшіне енген жоқ.

Елорда прокуратурасы азаматтарды қауіпсіздігіне қатер төнген жағдайда дереу құқық қорғау органдарына жүгінуге шақырады, сонымен қатар азаматтардың өміріне, денсаулығына және қол сұғылмаушылығына қарсы жасалған кез келген әрекет, оның ішінде қорқыту мен қудалау заңда белгіленген қылмыстық жауаптылыққа әкеп соғатынын ескертеді.

Бұған дейін Алматыда ер адам бұрынғы сүйіктісін сталкинг үшін айыптап, полицияға арызданғаны хабарланған болатын.

Бізді Google-дың негізгі дереккөздер тізіміне қосыңыз