Астанада ақша тарихына арналған музей ашылды

Астанада «Сенім» атты ақша тарихына арналған музей ашылды. Астана халықаралық қаржы орталығы аумағында орналасқан мұражайда тас ғасырынан бастап қазіргі заманға дейінгі ақшаның трансформациясын көрсететін жәдігерлер жиналған. Олардың дені қазіргі Қазақстан аумағынан табылған құнды ескерткіштер.

«Сенім» музейі жеті залдан тұрады. Кіреберісінде ең қымбат валюта сенім екенін дәлелдейтін бейнеролик көрсетіледі. Одан кейінгі зал тас дәуірінен бастап Қазақ хандығына дейінгі қаржылық және экономикалық қатынастардың тарихына арналған. 

Серік Селеубайұлы, тілші:

- Дәл қазір менің артымда ақша орнына пайдаланылған бұйымдар тұр. Бұл қатарда түрлі метал тиындар, айна, жебенің ұштары мен әшекейлер бар. Ал мына каури қабыршақтары тас ғасырында валюта рөлін атқарған. Бір қызығы, дәл осы қабыршақтар Астана маңындағы Бозоқ қаласының орнынан табылып отыр.

Келесі залда Ақмола облысында алғаш дүкендер мен өндірістік кәсіпорындар ашқан көпес Баймұхамбет Қосшығұлов отбасының суреттері бар. Сонымен қатар Қазақстан тәуелсіздігіне дейін сауда құралдары болған түрлі кітапшалар, билеттер мен банкноталар қойылған.

Айнұр Исабаева, АХҚО баспасөз хатшысы:

1993 жылы 15 қараша күні жаңа теңге айналымға енгізілді. Таңертеңгі сегізден 15 қараша күні 20 қарашаның кешкі сағат сегізіне дейін рубль теңгеге айырбасталды. Бір теңге 500 рубль болып есептелді. Алғашқы біздің теңгелеріміз англияда шығарылған болатын.

Алғашында тиындар да қағазға басылған. Бір жылдан кейін қазіргі метал монеталар Германияда жасалды. Музейде тиындардың осы нұсқалары да сақталған. Қазір төл теңгеміз толықтай елде дайындалып жүр. Қағаз ақшалар Алматыдағы фабрикада, монеталар Өскемендегі сарайда жасалады.

Айнұр Исабаева, АХҚО баспасөз хатшысы:

- 2011-2013 жылдары үш жыл қатарынан біздің банкноттарымыз әлемдегі ең әдемі банкнот болып, халықаралық банкноттық қауымдастық интернет арқылы дауыс берді. Сол дауыс берудің нәтижесі бойынша теңгеміз ең әдемі банкнота болып есептелді.

Сонымен қатар музейде замануи өнер туындылары да қойылған. Мәселен, цифрлы шаңырақ арт нысанында Астана Қаржы орталығы биржасындағы бағалар тікелей көрсетілген.

Серік Селеубайұлы, тілші:

- Мынау 1913 жылғы Жетысу теміржолының облигациясы. Оның сол кездегі құны 187 рубль болған. Бұл біздің жерде бір ғасыр бұрын да қаржы нарығының жолға қойылғанын көрсетеді.

Авторлары: Серік Селеубайұлы, Ғалымжан Абдылахат