Астанада базар өртке оранды

Астананың Сарыарқа ауданындағы көтерме-бөлшек сауда базарынан өрт шықты, деп хабарлайды Egemen.kz Төтенше жағдайлар министрлігінің баспасөз қызметіне сілтеме жасап. 

фото: digitalbusiness.kz

Өрт Дүкенұлы көшесіндегі бір қабатты ғимаратты шарпыған. Оқиға орнында құтқарушылар күшейтілген режимде жұмыс істеп жатыр, жедел штаб құрылды.

«Өртті сөндіру қиынға соқты, себебі келген сәтте жалын күш алып кеткен, сонымен қатар ғимарат құрылымының ерекшелігі, жоғары өрт жүктемесі мен қатты түтіндеу жағдайды күрделендіріп отыр», деді ТЖМ өкілдері.

Құтқарушылар ғимарат ішінде адамдардың бар-жоғын тексерді. Өрт кезінде тұтынушылар болмаған. Өрт сөндірушілер жалынның таралу қаупін жойды.

ТЖМ сағат 8:26-да өрттің оқшауланғанын хабарлады.

«Өрт сөндірушілер жасырын тұтану ошақтарын анықтау үшін ғимараттың бөлмелерін тексеріп жатыр», делінген хабарламада.

Өртті сөндіруге ТЖД-ның 95 қызметкері жұмылдырылды.

Жаңартылған деректерге сәйкес, өрт толық сөндірілді. Өрттің шығу себебі әзірге анықталған жоқ.