Астанада көмір сатып алуға өтемақы беріледі: оған кімдер құқылы

Астана қаласының тұрғындары үшін 2023 жылғы 3 қазанда Астана қаласы мәслихатының № 84/10-VIII шешімімен бекітілген «Әлеуметтік көмек көрсету, оның мөлшерін белгілеу және мұқтаж азаматтардың жекелеген санаттарының тізбесін айқындау қағидаларына» сәйкес, қатты отын, яғни көмір сатып алуға арналған әлеуметтік көмек қарастырылған.

Аталған көмек Астана қаласының Жұмыспен қамту және әлеуметтік қорғау басқармасы арқылы жүзеге асырылады.

Көмек келесі санаттағы азаматтарға тағайындалады:

жасы бойынша зейнеткерлер;

мүгедектігі бар адамдар;

мүгедектігі бар балалар;

әлеуметтік маңызы бар ауруларға шалдыққандар;

көпбалалы аналар және көпбалалы отбасылар;

жетім балалар, ата-анасының қамқорлығынсыз қалған балалар;

балалар үйлерінің түлектері;

асыраушысынан айырылу жағдайы бойынша мемлекеттік жәрдемақы алатын азаматтар
(олармен бірге тұратын 18 жасқа дейінгі балалар және күндізгі бөлімде оқитын, 23 жасқа дейінгі студенттер үшін).

Көмек алу үшін келесі шарттар орындалуы тиіс:

жан басына шаққандағы табыс мөлшері төрт ең төменгі күнкөріс деңгейінен аспауы тиіс;

көмек алатын азамат пен оның отбасы мүшелерінің басқа тұрғын үйі болмауы керек;

отбасы жеке меншігіндегі (немесе жалға алынған) жер (пешпен жылытылатын) үйде тұруы қажет.

2025 жылғы жылыту маусымына арналған өтемақы мөлшері — 16 айлық есептік көрсеткіш (АЕК), яғни 62 912 теңге.

— Егер қатты отын сатып алуға құқығы бар бірнеше адам бір жеке тұрғын үйде бірге тұратын болса, өтемақы тек біреуіне ғана беріледі, — делінген ведомство хабарламасында.

Қосымша ақпарат пен құжаттарды тапсыру тәртібі бойынша мәліметті Астана қаласының Жұмыспен қамту және әлеуметтік қорғау басқармасынан алуға болады.

Бұдан бұрын Астанада медицина қызметкерлеріне 90 млн теңге әлеуметтік аударым, сыйақы төленбегені анықталды.