Астанада өндірістік жарақаттану азаймай тұр: 2 адам қаза тапты

Оның айтуынша, 2026 жылдың басынан бері өндірісте 11 жұмыскер зардап шеккен. Оның ішінде 2 оқиға адам өлімімен аяқталып, 9 жұмыскер ауыр жарақат алған. Сонымен қатар жеңіл және орташа деңгейдегі 22 оқиға тіркелген.

— Жарақат алу деректері ең көп тіркелетін сала — құрылыс. Бұл салада еңбекті қорғау талаптарының жүйелі түрде бұзылатыны анықталып отыр, — деді Ерлан Исмағұлов.

Оның сөзінше, негізгі себептердің қатарында жұмыскерлерді еңбек шартынсыз жұмысқа тарту, міндетті сақтандырудың болмауы, ақаулы техниканы пайдалану және қауіпсіздік талаптарын сақтау деңгейінің төмендігі бар. Әсіресе қосалқы мердігер ұйымдардың жұмысы алаңдатады. Көп жағдайда мұндай ұйымдарда еңбекті қорғау қызметі ұйымдастырылмаған, қауіпсіздік бойынша нұсқама берілмейді, жұмыскерлер жеке қорғаныс құралдарымен толық қамтылмайды.
Осыған байланысты өндірістегі қауіпсіздікті күшейту бағытындағы жұмыс жалғасып жатыр.

— Мемлекеттік еңбек инспекторлары прокуратура органдарымен және кәсіподақтармен бірлесіп, еңбек ұжымдарымен көшпелі кездесулер өткізіп келеді. 2025 жылы 73-тен астам іс-шара ұйымдастырылып, 4 400-ден астам қызметкер қамтылды, — деді Ерлан Исмағұлов.

Оның айтуынша, жазатайым оқиғалар туралы жедел ақпарат алу үшін «iKomek 109» қызметінің WhatsApp-чаты жұмыс істейді.

— Бұл арна арқылы өндірістегі жазатайым оқиғалар туралы хабарламалар жедел қабылданып, тиісті шаралар қабылданады, — деді ол.

Айта кетейік, бұған дейін өндірісте жарақат алған қызметкерге өтемақы қалай есептелетіні туралы жазған едік.