Астанада қасбеттің құлауынан зардап шеккен фельдшер көз жұмды

8 қарашада Астанада Тәуелсіздік даңғылы бойындағы көпқабатты үйдің қасбетінен кірпіш қаптама мен кондиционер құлаған еді, деп хабарлайды Arasha.kz.

Оқиға кезінде үш адам зардап шекті, олардың екеуі — фельдшерлер.

Сол фельдшерлердің бірі бірнеше күн бойы ауыр халде болды. Ол қиранды астында қалған адамдарды шығарып алуға тырысқан сәтте, тоғызыншы қабаттан құлаған кондиционер оның басына тиген.

Бүгін оның қайтыс болғаны белгілі болды.

«Өкінішке қарай, алған жарақаттарының салдарынан ол көз жұмды. Ол өз ісіне берілген, батыл, жанашыр — соңғы сәтіне дейін адамдарға көмек көрсетуін тоқтатпаған нағыз маман еді», — деп жазды Астана қаласы Денсаулық сақтау басқармасының басшысы Әлия Рүстемова Instagram парақшасында.