Астанада жеңілдетілген кредит алмақ болған ондаған адам жер сипап қалды

АСТАНА, 20 қараша – Sputnik. Астанада ер адам жеңілдетілген кредит рәсімдеуге көмектесемін деп 16 адамды алдап соққан, деп хабарлайды Sputnik Қазақстан.

Қалалық прокуратураның мәліметінше, залалдың жалпы сомасы 4 млн теңгеден асқан.

"Жеңілдетілген кредит алуға уәде берген алаяққа азаматтар бір ай бойы ақша аударған", - деп жазылған хабарламада.

Ол өзін ұлттық компанияның қызметкерімін деп таныстырып, қызметін 100 мың теңгеге бағалап, жеңілдетілген шарттармен несие алуға көмектесуді ұсынған.

Сот ер адамды кінәлі деп тауып, 4 жылға бас бостандығынан айырды.Келтірілген материалдық шығын өндірілді. Үкім заңды күшіне енді.

Прокуратура қырағылық танытып, ресми ақпарат көздері арқылы ақпараттың дұрыстығын тексеру қажеттігін еске салды.