Астанадағы LRT желісінде 19 пойыз жүреді

Астанада салынып жатқан жеңіл рельсті көлік жүйесінің (LRT) жалпы құны өзгеріссіз қалған, – деп хабарлайды Aikyn.kz сайты.

Бұл туралы CTS басқарма төрағасы Асылбек Дүйсебаев мәлімдеді.

Оның айтуынша, жоба 2016 жылы бекітілген келісімшарт негізінде жүзеге асырылып жатыр. Сол кезде LRT құрылысының жалпы құны 1,8 миллиард доллар болып белгіленген.

Жоба аясында Есіл өзені арқылы ұзындығы 155 метр болатын аспалы көпір салынған. Көпірдің ені – 14 метр, ал биіктігі – 28 метр. Арка үлгісіндегі бұл құрылым елордадағы жаңа инженерлік нысандардың біріне айналмақ.

CTS басшысының сөзінше, LRT жүйесінде барлығы 18 станса қарастырылған. Оның 11-і жердегі, ал 7-еуі жер үстіндегі станса болады.

– Бір пойыз құрамының ұзындығы – 60 метр. Биіктігі – 3,8 метр, ені – 2,8 метр. Жобаның құны 2016 жылы бекітіліп, 1,8 миллиард доллар болып белгіленген. Бүгінге дейін бұл сома өзгерген жоқ. Соған қарамастан, техникалық сипаттамалар жетілдіріліп, пойыздардың моделі мен дизайны жаңартылды. Сонымен қатар, LRT желісі бойында абаттандыру жұмыстары жүргізілді, – деді Асылбек Дүйсебаев.

Жалпы, LRT желісінде 19 пойыз жүреді деп жоспарланған. Оның 15-і күнделікті жолаушы тасымалдайды, ал 4 пойыз резервте тұрады.

Сондай-ақ, пойыздардың орташа жылдамдығы сағатына 60 шақырым болса, ең жоғары жылдамдығы сағатына 80 шақырымға дейін жетеді.