Атырау әуежайында шетелдік азамат қайтыс болды полиция мән жайды айтты

"Аэрофлот" әуекомпаниясының жолаушысы Атырау әуежайына шұғыл қонғаннан кейін қайтыс болды. Оқиғаның мән-жайын Көліктегі полиция департаментінің баспасөз қызметі мәлім етті, - деп хабарлайды Tengri Travel.

Жолаушының өлімі туралы дерек 25 тамызда Атырау станциясындағы желілік полиция бөлімінде тіркелді.

Көліктегі полиция департаменті қазіргі уақытта алғашқы тексеру шаралары жүргізіліп жатқанын хабарлады. Олардың мақсаты - оқиғаның барлық мән-жайын анықтау.

"Қазіргі уақытта оқиғаның барлық мән-жайын анықтауға бағытталған алғашқы кешенді тексеру іс-шаралары жүргізіліп жатыр", - деп хабарлады полиция.

Алдын ала мәліметтер бойынша, өлімге жедел жүрек жетіспеушілігі себеп болған.

Бұл ретте полиция өзге мәліметтерді әзірге жариялаған жоқ. Ведомство өкілдері ҚР Қылмыстық-процестік кодексінің 201-бабына сәйкес өзге ақпарат жария етуге жатпайтынын түсіндірді.

Атырау әуежайының баспасөз қызметі қажетті рәсімдер аяқталғаннан кейін әуе кемесі Атырау - Екатеринбург бағыты бойынша рейсті әрі қарай жалғастырғанын қосты.

"Ұшақ қонғанға дейін әуежайдың тиісті қызметтері хабардар етілді және медициналық бригада әуе кемесін перронда күтіп тұрды. Медицина қызметкерлері жолаушыны тексергеннен кейін оның өмір белгілері жоқ екенін анықтады. Жолаушының денесі борттан түсіріліп, әрі қарайғы рәсімдер үшін тиісті қызметтерге берілді. Марқұммен бірге болған жолаушы әйел де рейстен қалды", - деп хабарлады әуе айлағы.

Бұған дейін әлеуметтік желілерде оқиға туралы ақпарат пайда болды. Түркиядан Ресейге бет алған "Аэрофлот" жолаушысының Атырау халықаралық әуежайында көз жұмғаны хабарланған болатын.

Тараған ақпаратқа сәйкес, ұшақ Антальядан Екатеринбургке бағыт алған. Алдын ала мәлімет бойынша, ұшу кезінде 41 жастағы жолаушының денсаулығы күрт нашарлаған.

Ер адам Түркиядағы демалыстан үйіне қайтып бара жатқан. Жағдайы нашарлаған соң, экипаж бағытты өзгертіп, Атырауға шұғыл қону туралы шешім қабылдаған. Қонғаннан кейін жолаушы қайтыс болды.

Жоспардан тыс қонуға байланысты рейс Екатеринбургке белгіленген кесте бойынша жете алмады. БАҚ мәліметінше, жалпы кідіріс 2 сағат 25 минутты құрады.

Тағы оқыңыз: Ұшқыштар мен бортсеріктер алаңдатарлық рейтингте көш бастады

Google News арқылы жаңалықтарымызды қадағалаңыз