Атырау облысында Крещение рәсіміне арналған шомылу орындары белгіленді

Атырау облысында православ христиандарының діни мерекесін қауіпсіз өткізу мақсатында суға шомылуға арналған арнайы орындар дайындалды. 

Діни рәсім 18 қаңтардан 19 қаңтарға қараған түні өтеді. Бұл туралы Өңірлік коммуникациялар қызметіндегі баспасөз брифингінде жауапты мемлекеттік органдар мәлімдеді.

Атырау облысы ТЖД Төтенше жағдайларды жою басқармасының бастығы Жантөре Демешовтың мәліметінше, шомылу рәсіміне Атырау қаласынан 3 орын, Индер, Махамбет, Жылыой және Құрманғазы аудандарында 1 орыннан анықталған. Белгіленген су айдындарындағы мұздың қалыңдығы қала аумағында 15 см, ал аудандарда 18–25 см аралығында.

18–20 қаңтар аралығында департаменттің және ведомстволық бөлімшелердің жеке құрамы күшейтілген кезекшілік режиміне көшеді. Белгіленген орындарда құтқарушылар мен медициналық қызметкерлердің тұрақты кезекшілігі ұйымдастырылады. Сонымен қатар ауа температурасының төмендеуіне байланысты азаматтарға қауіпсіздік талаптарын қатаң сақтау ұсынылады.

Атырау облысы Дін істері басқармасының басшысы Қаһарман Мұсаев діни рәсімдерді өткізу кезінде заң талаптарын сақтау маңызды екенін атап өтті.

"Қауіпсіздік барлық деңгейде қамтамасыз етіледі. Дегенмен әрбір азаматтың жеке қауіпсіздігі өз жауапкершілігінде екенін еске саламыз. Суға түсу алдында денсаулық жағдайын ескеріп, алкогольдік ішімдік ішпеу қажет. Балалар шоқыну рәсіміне тек ата-анасының қадағалауымен ғана қатысуы тиіс", – деді ол.

Қазақстан Республикасының «Діни қызмет және діни бірлестіктер туралы» Заңының 7-1 бабына сәйкес, діни рәсімдерді, оның ішінде шоқыну рәсімін тек арнайы белгіленген орындарда ғана өткізуге рұқсат етіледі. Белгіленбеген жерлерде суға түскені үшін ҚР ӘҚБтК-нің 412-бабына сәйкес 7 АЕК мөлшерінде айыппұл қарастырылған.

Бүгін, 20:06