Атырауда балалар арасында жаппай сырқаттану байқалуда, бірақ Гонконг тұмауы расталмады

Атырауда ата-аналар бірнеше күннен бері балалар арасында аурудың күрт көбейгенін талқылап жатыр. Кейбір мектептер мен балабақшаларда сыныптар мен топтар айтарлықтай босап қалған, кей жерлерде сабаққа балалардың жартысы ғана келуде.

Ауру кенеттен басталып, көп жағдайда бірдей өрбиді.

Ата-аналар симптомдардың бірнеше сағаттың ішінде пайда болатынын айтады.

«Таңертең ұлым сергек болды, күндегіше мектепке кетті. Түсте : “Қызуы отыз тоғызға жақындады, алып кетіңіз” деп қоңырау соқты. Басы қатты ауырып, басын көтере алмайтынын айтты», — дейді атыраулық тұрғын.

Осындай жағдай балабақшаларда да байқалады. «Қызымның таңертең ештеңесі жоқ еді. Бір-екі сағаттан кейін тәрбиеші: “Қызыңызда әлсіздік бар, тамағын ұстай береді, қызуы көтеріліп жатыр” деді. Ауру тез өрбиді», — дейді бес жасар қыздың әкесі Ерлан.

Көп балада симптомдар бірдей: қатты бас ауруы, әлсіздік, қалтырау, тамақтың жыбырлаы, қызудың қатты көтерілуі. Жөтел кейінірек пайда болуы мүмкін немесе мүлдем болмауы да ықтимал.

Педиатрлар бұл жағдайды күзгі маусымда жабық ұжымдарда жиілейтін жедел респираторлық вирустық инфекциялармен байланыстырады.

«Бұл — маусымдық жедел респираторлық вирус инфекцияларына тән көрініс. Балаға мол су ішкізіп, қызуды бақылап, жағдайын қадағалау қажет», — дейді дәрігерлер.

Мамандар қазіргі мәліметтерге сәйкес, көп шағымдар жедел вирустық симптоматикаға байланысты екенін атап өтті. Қазіргі кезде дәрігерлер асқыну қаупін нақтылап жатыр, 

Атырау инфекциялық ауруханасының дерегінше, 15–16 қараша күндері тәулік ішінде қабылдау бөліміне 218 пациент түскен. Олардың арасында бір жасқа дейінгі балалар, балабақша және мектеп жасындағы балалар, сондай-ақ жүкті әйелдер болған. 15 жастан асқан ересек пациенттер бұл кезеңде ауруханаға жатқызылмаған.

«Ресми түрде аурудың өршуі тіркелген жоқ, облыста “гонконг тұмауы” диагнозы анықталмады», — деді Атырау облыстық денсаулық сақтау басқармасының баспасөз хатшысы Нұрайым Махонова.

Мектептер мен балабақшалар қалыпты режимде жұмысын жалғастырып жатыр. Кейбір мекемелерде инфекцияның таралуын баяулату үшін уақытша маска тағу тәртібі енгізілген.

Ал ата-аналар чаттарында уақытша онлайн оқытуға көшу туралы ұсыныстар айтылуда — себебі сыныптың жартысы ауырса, балалар оқу процесінен қалып, материалды түрлі қарқынмен меңгереді.

Елена СҮНДЕТОВА

Бүгін, 17:39