Атырауда оқушылар жаппай ауырып жатыр, ата аналар қашықтан оқытуды сұрайды

«Ақ Жайық» редакциясына жарияланған материалдан кейін көп ата-ана хабарласып, жағдайдың күн сайын нашарлап бара жатқанын айтты. Кей сыныптарда оқушыларды саусақпен санап алатындай деңгейге жеткен.

Соған қарамастан мектептер әлі де қалыпты режимде жұмыс істеп тұр, ал уақытша онлайн оқытуға көшіру мүмкіндігі қарастырылмай отыр.

Ата-аналардың айтуынша, балалар топ-топ болып ауыра бастаған. Кейбірі сыныптағы жағдай толық тұрақтамай жатып қайта сабаққа келеді. Күн сайын жаңа жағдайлар тіркеліп жатқанына қарамастан, ресми ақпарат жоқ.

Бір ана; «Бүгін баламның сыныбында бірнеше-ақ оқушы келді. Мұғалімдер де ауырып жатыр, бірақ сабақ тоқтаған жоқ. Неліктен ең болмаса кейбір сыныптарды уақытша онлайнға ауыстырмайды?» - дейді.

Әлеуметтік желідегі пікірлердің бірінде басқа ата-ана былай деп жазған:

«Қазір онлайн оқу – жай қолайлылық үшін емес. Балалар қатты ауырып жатыр, температура бірнеше сағаттың ішінде қырық градусқа дейін көтеріліп кетеді. Дәрігер шақыру қиын, емханаларда бірнеше күн бұрын кезекке жазылады. Осындай жағдайда тұрақты сабақ болуы мүмкін емес. Қазір денсаулық бәрінен маңызды».

Кейбір ата-аналар мектептерге де, білім басқармасына да жүгінген. Бірақ жауап бір: «қашықтан оқытуға негіз жоқ». Адамдар нақты қандай жағдайда онлайн форматқа көшуге болатынын түсінбей отыр.

Қазіргі таңда жағдай туралы ресми деректер жарияланбаған. Облыстық денсаулық сақтау басқармасы түсініктеме бермеді. Білім басқармасы санитарлық қызметтің жалпы ұсыныстарымен шектеліп отыр. Маска тағу режимі тек кейбір мектептерде ғана енгізілген, мұндай шаралардың бірізді болмауы да сауал туғызады.

Қазақстанның басқа өңірлерінде де осындай көрініс байқалады. Қазіргі таңда 7 облыстағы 132 мектепте 1469 сынып онлайн форматқа көшірілген. Қазақстанның Бас мемлекеттік санитар дәрігері Сархат Бейсенова оқушылардың 20 пайызынан астамы ауырған жағдайда кабинетте оқыту жүйесі тоқтатылатынын, ал 30 пайызы ауырса – сынып онлайн форматқа ауыстырылатынын еске салды.

Жағдайды одан әрі күрделендіріп тұрған тағы бір мәселе — дәрі-дәрмек тапшылығы. Маусымдық вирустық инфекцияларға тағайындалатын осельтамивир негізіндегі препараттар дәріханаларда жоқтың қасы. Дәріхана қызметкерлері бұл дәрілерге сұраныс күрт артқанын және жеткізілім көлемі шектеулі екенін растап отыр.

«Ақ Жайық» редакциясы қазіргі жағдайға байланысты тиісті мекемелерден ресми түсініктеме күтуде.

Елена СҮНДЕТОВА

Бүгін, 17:34