Атыраудағы полиция департаментінің ғимараты қаңырап тұр

Бұрынғы полиция ғимараты төрт жылдан бері қаңырап тұр. Қазір ол бос орындарды аралауды ұнататындардың қызығушылығын тудырып жүр.

Облыстық полиция департаментінің қызметкерлері 2023 жылдың мамырында Нұрсая ықшамауданындағы жаңа ғимаратқа көшкен. Ал ескі бес қабатты ғимаратты (Азаттық даңғылы бойында) төтенше жағдайлар департаментіне беру жоспарланған еді. (Айта кетейік, бастапқыда бұл жерде «Гурьевнефтехимстрой» тресті орналасқан, ол өңірде мұнай-газ химия нысандарын салған. 90-жылдары трест таратылған соң ғимаратта ІІБ орналасты - автор).

Полиция көшкеннен кейін қараусыз қалған ғимарат тез қирай бастады. Жастардың қызығушылығын оятып, әлеуметтік желілерде бейнежазбалар тарады: онда жасөспірімдер әр қабатты аралап, қираған кабинеттерді түсірген. Кейбірінің Ішінде аздаған жиһаз бен заттар қалған. Бірақ «серуен» ұзаққа созылмады, әлдекім балаларды қорқытып жіберген соң олар тез шығып кеткен.

«АЖ» редакциясы ғимараттың тағдыры туралы ТЖ департаментінен сұрастырған еді. Ондағылар нысан әзірге олардың балансында емес екенін, бірақ тәулік бойы бір қызметкер күзететінін айтты.

«Бөгде адамдар ғимаратқа артқы есікті бұзып кірген», – деп түсіндірді ТЖД өкілдері видеоны.

Сонымен қатар, нысанды күрделі жөндеуге арналған жобалық-сметалық құжаттама дайындалып, жөндеу жұмыстарына тендер жарияланғаны хабарланды. Еске салсақ, ЖСҚ-ға бюджеттен шамамен 16 млн теңге бөлінген.

Лев ГУЗИКОВ

Бүгін, 14:35