Ауыл көшесінен ес түссіз табылған оқушы: Ақмола облысында жасөспірім қыз алкогольден уланды

Дәрігерлер оның этил спиртінен, яғни алкогольден ауыр уланғанын анықтаған. Оқиғаға байланысты кәмелетке толмаған баланың ата-анасы әкімшілік жауапкершілікке тартылды. Ал полиция болған жайттың мән-жайын анықтап жатыр, – деп хабарлайды Aikyn.kz порталының тілшісі.

Оқиға облыс орталығына жақын ауылдардың бірінде болған. Көшеде жатқан қызды ауыл тұрғындарының бірі байқап, оның жағдайына алаңдаған. Кейін жасөспірім құсу белгілерімен, ұйқыға кеткен күйде медициналық мекемеге жеткізілген. Дәрігерлердің анықтауынша, мектеп оқушысы этил спиртінен ауыр уланған. Алайда оның алкогольді қандай жағдайда ішкені, ішімдікке қалай қол жеткізгені және оқиғаға не себеп болғаны әзірге беймәлім болып отыр. Бұл сұрақтардың жауабын полиция қызметкерлері анықтап жатыр.

Ақмола облыстық Полиция департаментінің мәліметінше, аталған дерек бойынша кәмелетке толмаған қыздың ата-анасы әкімшілік жауапкершілікке тартылған. Сонымен қатар олармен профилактикалық түсіндіру әңгімесі жүргізілген. Полицияның хабарлауынша, жасөспірімге қатысты құқыққа қайшы әрекеттер жасалғаны анықталмаған. 

- Қазіргі уақытта кәмелетке толмаған бала медициналық мекемеде бақылауда. Полиция қызметкерлері оқиғаның барлық мән-жайын анықтап жатыр, – деп хабарлады Ақмола облыстық Полиция департаментінің баспасөз қызметінен.

Бұл оқиға жасөспірімдердің қауіпсіздігі мен ата-ананың бала алдындағы жауапкершілігі мәселесін тағы да күн тәртібіне шығарды. Әсіресе, мектеп жасындағы баланың алкогольден ауыр күйде улануы елеусіз қалдыруға болмайтын жағдай. Дегенмен әзірге қыздың ішімдікті қандай жағдайда тұтынғаны, оқиғаға басқа адамдардың қатысы бар-жоғы және оның көшеде қандай жағдайда қалғаны туралы нақты ақпарат жоқ. Сондықтан болған жағдайға қатысты түпкілікті қорытынды жасауға әлі ерте. Полиция оқиғаның барлық мән-жайын анықтап жатыр. Ал жасөспірімнің денсаулық жағдайына қатысты қосымша мәлімет жарияланған жоқ.

Абзал АЛПЫСБАЙҰЛЫ, Ақмола облысы

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.