Байқоңырда Жеңіс парады өтті

АСТАНА, 9 мамыр – Sputnik. Байқоңыр қаласында 9 мамыр - Жеңіс күніне арналған парад өтті, деп хабарлайды Sputnik Қазақстан.

Қаладағы мерекелік шаралар Жеңіс ескерткішінен басталды. Сол жерде құрметті қарауыл сап түзеп, мәңгілік алауға гүл шоқтары қойылды. Ал Ленин алаңында Ұлы Жеңістің 81 жылдығына арналған әскери парад өтті.

Салтанатты шараның басында Қазақстан мен Ресейдің тулары, сондай-ақ, Жеңіс туы шығарылды. Отшашу атылғаннан кейін екі елдің әнұраны орындалды. Ал парад жетекшісі қала әкімшілігінің басшысы Константин Бусыгинге парадты өткізуге дайын екенін баяндады. Бусыгин алаңға жиналғандардың барлығын Жеңіс күнімен құттықтады.

"Біздің әкелеріміз, ата-бабаларымыз дүниежүзілік соғысты тоқтатып қана қоймай, әлемді үлкен зұлымдық-фашизмнен азат етті. Біз олардың алдында өтелмес қарыздармыз. Жеңістің қалай келгенін біле тұра, оларды ұмытпай, өскелең ұрпаққа жеткізуге міндеттіміз. Қанша жыл өтсе де, халықтарымыздың ерлігін ешқашан ұмытпаймыз, олардың батылдығы мен қайсарлығымен мақтанамыз", - деді Бусыгин.

Бір минут үнсіздіктен кейін қаладағы қазақстандық және ресейлік құқық қорғау органдарының қызметкерлері, сондай-ақ, мектеп оқушылары салтанатты маршпен жүріп өтті. Парадты полиция подполковнигі Илья Шкрум басқарды.

Кешке қарай алаңда мерекелік концерт өтеді. Ал түнгі сағат 21:55-де отшашу атылады.