Бәйтерек ұлттық инвестициялық холдингке айналады

«Бәйтерек» холдингі алдағы үш жылда инвестиция өсімінің басты қозғаушы күштерінің біріне айналмақ.

Кеше Үкімет отырысында Ұлттық банк және Қаржы нарығын реттеу және дамыту агенттігімен бірлесіп әзірленген 2028 жылға дейінгі іс-қимыл бағдарламасы таныстырылды. Бағдарлама аясында «Бәйтерек» инвестициялық жобаларды қаржыландырып, экономиканың жаңа салаларына дем бермек. Бұл мақсатта холдинг биылдың өзінде 5,7 трлн теңге көлемінде кәсіпкерлерге қаржылай қолдау көрсеткен.

«Бәйтерек» ұлттық инвестициялық холдингке айналады. Қазақстанның инвестициялық мүмкіндіктерін арттыру үшін холдинг ішкі және сыртқы нарықтан жыл сайын 7 трлн теңгеге дейін қаржы тартуды жоспарлап отыр.

Жандос Шайхы, «Бәйтерек» Ұлттық басқарушы холдингі» АҚ басқарма төрағасының орынбасары:

- Біздің басты мақсатымыз – экономикалық өсім сапасын көтеру. «Бәйтеректің» негізгі қызметі – осы шикізатты терең өңдейтін жобаларды қаржыландыру және өнімді жоғары деңгейде қайта өңделген күйінде сату.

Бұл ретте холдинг макроэкономикалық тұрақтылыққа баса назар аударып, инфляцияны төмендету, ішкі өндірісті дамыту мен азаматтардың әл-ауқатын арттыруға басымдық бермек. Тау-кен өнеркәсібі, машина жасау, мұнай-газ, энергетика, туризм және азық-түлік өнеркәсібі сынды стратегиялық маңызы бар салаларда инвестициялық жобалар пулын қалыптастыру да көзделіп отыр.

Жандос Шайхы, «Бәйтерек» Ұлттық басқарушы холдингі» АҚ басқарма төрағасының орынбасары:

- Мысалы, сода өндірісінің жолға қойылуы тұрмыстық химия, органикалық және бейорганикалық химия салаларында жаңа өндірістерді ашуға әрі оларды қаржыландыруға мүмкіндік береді. Ал импорттың азаюы, шетел валютасына деген сұраныстың төмендеуіне әкеледі. Демек Қазақстаннан шығатын қаражат көлемі қысқарады. Бұл өз кезегінде инфляцияның төмендеуіне ықпал етеді.

Сондай-ақ холдинг экспорттық әлеуеті бар компаниялардың шетелдік нарыққа шығуына қолайлы жағдай жасауды да мақсат тұтады. Осылайша, жаңа жұмыс моделі «Бәйтеректі» елдегі бизнес өсімін қамтамасыз ететін экономиканы дамытудағы негізгі қозғаушы күштің біріне айналдырмақ.

Авторлары: Назым Кенжебай, Диас Ковланбаев