Бангладеште өлім жазасына кесілген Шейх Хасинаға жаңа жаза тағайындалды

Бангладеш соты бұрынғы премьер-министр Шейх Хасина Вазедке қатысты жаңа үкім шығарды. Ол 17 қарашада адамзатқа қарсы қылмыстар үшін сырттай өлім жазасына кесілген болатын, деп хабарлайды АА.

Dhaka Tribune басылымының хабарлауынша, Дакка қаласының соты Хасина мен оның отбасы мүшелеріне қатысты үш бөлек іс бойынша шешім шығарды. Оларға «мемлекеттік жерлерді заңсыз бөлу» айыбы тағылған.

Сот әр іс бойынша Хасинаны 7 жылға бас бостандығынан айырды. Жалпы ол 21 жыл түрме жазасына сотталды. Сондай-ақ оның ұлы мен қызы да түрме жазасын алды.

Бангладеште шілде айында студенттер мемлекеттік қызметке қабылдауда 1971 жылғы Тәуелсіздік соғысына қатысқандардың балаларына берілетін квоталарға қарсы жаппай протест бастаған. Жоғарғы сот квотаны қысқартқаннан кейін жағдай біршама тынышталған еді.

Алайда кейін «Жамаат-и-Ислами» партиясы мен оның студенттік ұйымы шерулер кезіндегі күш қолдану үшін тыйым салынған соң, митингілер қайта жалғасты. Наразылар бұл жолы демонстрациялар кезінде қаза тапқандар үшін «әділдік» талап етті. Қақтығыстар салдарынан жүздеген адам көз жұмып, мыңдаған адам ұсталды.

Осы жағдайлар кезінде премьер-министр Шейх Хасина өз резиденциясынан шығып, әскери тікұшақпен Үндістанға ұшып кетті. Сол уақытта наразылар оның резиденциясына басып кірген.

8 тамыз 2024 жылы Нобель сыйлығының лауреаты Мұхаммед Юнус ант беріп, уақытша үкіметті басқаруды қолға алды.

17 қарашада Бангладештің Халықаралық қылмыстық трибуналы Хасинаны протесттер кезіндегі адамдардың қаза болуына жеке жауапты деп тауып, өлім жазасына кескен еді.

Бүгін, 11:06