БАҚ саласы мамандары баспаналы болды

Суретті түсірген – Ерлан ОМАР, «ЕQ»

Президент тапсырмасымен БАҚ қызмет­керлеріне пәтер беру бастамасы биыл төртінші жыл қатарынан жүзеге асырылып келеді.

Салтанатты іс-шарада Айбек Сма­дияров бұл жобаның биылғы ерекшелігі – пәтерлердің Астанада ғана емес, Алматы мен еліміздің бар­лық облысында да берілетінін жеткізді.

– Мұндағы мақсат – өңірлік журналистиканы дамыту және әріптестерді әлеуметтік тұрғыда қолдау. Мереке қарсаңында облыстық ақпарат құралдарының қызметкерлері,  сондай-ақ респуб­ликалық БАҚ-тардың жергілікті тілшілері қоныстойын тойлағалы жатыр. Тіпті орталықтан шалғай елді мекендер де назардан тыс қалған жоқ. Мысалы, бұл жолы Қостанай облысының Арқалық қаласында және Түркістан облысының Созақ ауданында тұратын әріптестеріміз үйлі болмақ, – деді ол.

Осы жылы БАҚ қызметкер­леріне 66 пәтер беріледі. Оның ішінде Астана қа­ласына – 15, Алматы қаласына – 15, қалған 18 аймаққа 2 пәтерден бөлінді. Баспана бақыты бұйырғандардың қатарында «Қазақ газеттері» серіктестігіне қарасты «Egemen Qazaqstan» газетінің корректоры Әсел Бейсенова да бар. Ол қазақ баспасөзінің қара шаңырағында табан аудармай 16 жылдан аса уақыт еңбек етіп келеді. Сондай-ақ «Казахстанская правда» газеті тілшілер желісінің үйлестірушісі Әлия Жаманбалинова да бұл күні жаңа пәтердің кілтін қолына алды.

– Бұл – мереке қарсаңындағы ең үлкен әрі күтпеген сый болды. Осындай қуанышты сәтті сыйлаған барша азаматтарға мың алғыс! Президентке, газетіміздің басшылығына және барша ұжымға шынайы алғысымды білдіремін. Алла баршаңызға денсаулық, амандық беріп, барлық игі ниет-пейілдеріңіз бен тілектеріңіздің орындалуын нәсіп етсін. Қазір қуаныштан ерекше толқып тұрмын, тіпті сөз табу қиын. Шын жүректен рахмет! – деп әріптесіміз Ә.Бейсенова ақжарма тілегін айтты.

Баспанаға үміткерлерді анық­тау, пәтерлерді даярлау жұмысын «Dara» президенттік бастамаларды қолдау қоры, Президенттің Іс басқармасы, жергілікті атқарушы органдар мен БАҚ редакциялары бірлесе жүргізді.

Айта кетейік, өткен үш жылда Президент атынан БАҚ сала­сының 200 қызметкеріне баспана берілді.