Баспаналы болудың бір жолы

«Бәйтерек» холдингінің еншілес ұйымы «Отбасы банк» тұрғын үй құрылыс жинақ банкі» АҚ алғаш рет ұлттық даму институты мәрте­бесінде өңірлерде жалдамалы тұрғын үйді бөлу жұмысын бастады.

Қазірдің өзінде тоғыз облыстың әкімдіктері банке 1 550 пәтер тап­сыр­ды. Нәтижесінде, жақын уақыт­та Жамбыл, Шығыс Қазақстан, Ақмо­ла, Ақтөбе, Же­тісу, Ұлытау, Қара­ғанды, Абай, Қызыл­орда облыста­рында тұрғын үйге кезекте тұрған адамдар қоныс тойын тойлайды.

Жалдамалы тұрғын үйді бөлу кезін­де есепке алынған күні, санаттың басым­дығы, отбасының табыс деңгейі ескері­леді. Егер отба­сында үш, одан көп адам болса, бір адамға шаққандағы табыс 92 456 теңгеден (2 АЕК) аспауға тиіс. Егер отбасында екі немесе одан аз адам болса, әрбір мүшесіне шаққандағы табыс 161 798 теңгеден (3,5 АЕК) аспауы керек.

Барлық кезекте тұрған азаматтар туралы мәліметтерді «Отбасы банк» мемлекеттік деректер қорынан алады. Бұл азаматтарға өте ыңғайлы – енді анық­тама жинап, көшірмелерін жасап, бөлім­шеге барудың немесе порталға жүк­теу­дің қажеті жоқ. Алайда банк дерек­терді жедел тексеріп, тұрғын үйді әділ бөле алуы үшін азаматтар жеке дерек­терді жинауға, өңдеуге келісім беруге тиіс. Келісімді orken.otbasybank.kz пор­талындағы жеке кабинет арқылы рәсім­деу қажет. Сонымен қатар азаматтар өздерінің мобильді азаматтар база­сын­дағы телефон нөмірін жаңартуы керек.

Егер тұрғын үй кезегінде тұрған азамат жеке деректерін жинауға, өңдеуге келісім бермесе, мобильді нөмірін жаңартпаса, жалдамалы тұрғын үй ала алмайды немесе 2%, 5% жеңілдік мөлшерлемесімен тұрғын үй сатып алу мүмкіндігінен айырылады. Мұндай жағдайда оған тиесілі тұрғын үй кезекте тұрған басқа азаматқа беріледі. Қазірде әкімдіктердің Kezekte.kz базасынан «Отбасы банкке» өткен 642 281 кезекте тұрған азаматтың ішінде бар болғаны 84 338 адам ғана жеке деректерін өңдеуге келісім берген. Бұл небәрі 13%.

Осының салдарынан авто­маттанды­рылған жүйе тұрғын үйге мұқтаж азаматтар туралы де­ректерді толық тексере алмай отыр, тұрғын үйді бөлу үдерісі баяу жүріп жатыр. Жақында өңірлердің бірінде өткізілген қанатқақты жоба бұл жағдайды айқын танытты. Әкімдік 261 пәтер ұсынған болатын. 215 пәтер тұрғын үй кезегінде тұрған азаматтарға бөлінді. Алайда олардың арасынан бар болғаны 19 адам ғана orken.otbasybank.kz платформасында жеке деректерді жинауға, өңдеуге келісім берген. Қазірде бұл азаматтар жалдау шартын жасасып жа­тыр. Қалған 196 азаматқа қатысты банк олар­дың келісімін күтіп отыр. Бос пәтер­лер келесі кезеңде бөлінетін болады.

Тұрғын үйді бөлу үдерісін жеделдету мақсатында «Отбасы банк» бұрын Kezekte.kz базасында тіркелген азаматтарды orken.otbasybank.kz порталын­да жеке деректерді жинауға, өңдеу­ге келі­сім беруге, сондай-ақ мобиль­ді аза­­маттар базасындағы теле­фон нө­­мі­рін жаңартуға шақыра­ды. Бұл шара­лар тұрғын үй кезе­гінің жыл­­жуын тезде­тіп, мыңда­ған отан­­дасымыздың қо­­ныс то­йын жа­қындатуға мүмкіндік береді.