Батыс Қазақстанда 49 мыңға жуық адам тұмауға қарсы екпе алды

БҚО санитариялық-эпидемиологиялық бақылау департаментінің баспасөз маманы Кенжегүл Мұхитованың мәлім еткеніндей, эпидемиялық маусымға байланысты 30 қыркүйектен бастап тұрғындар тұмауға қарсы Ресей Федерациясында өндірілген «Гриппол+» вакцинасын алды.

Оның сөзіне қарағанда, вакцинация барлық емханада, сондай-ақ қалалық және аудандық ауруханаларда тегін салынып жатыр. Жалпы, облысқа 60 мың доза вакцина жеткізілді. Вакцина салудың басты мақсаты — халықты тұмаудың асқынуынан қорғау және аурудың таралуын азайту.

— Науқан басталғаннан бері өңірде 48 611 адам, яғни вакцина алуға тиісті тұрғындардың 81,03 пайызы екпе алды. Екпе салу осы айдың соңына дейін жалғасады, — дейді Кенжегүл Мұхитова.

Оның айтуынша, ең алдымен медицина қызметкерлері, емдеу мекемелерінде есепте тұрған және жиі ауыратын балалар, балалар үйінің тәрбиеленушілері мен қарттар үйіндегі қариялар, созылмалы аурулары бар ересектер екпе алып жатыр.

Сонымен қатар эпидемиологиялық көрсеткіштер бойынша жүкті әйелдер, мектеп оқушылары, жоғары және орта оқу орындарының студенттері мен қызметкерлері науқаннан тыс қалмайды.

Мамандар екпе алу арқылы тұмаудың ауыр түрлерінен және асқынуларынан (пневмония, бронхит, отит және басқа) сақтануға болатынын еске салады.

Департамент мәліметі бойынша қазан айы басталғаннан бері облыста 9 918 адамның жіті респираторлық вирустық инфекциялармен (ЖРВИ) ауырғаны тіркелді. Соның 6 841-і немесе 68,9 пайызы 14 жасқа дейінгі балалар болса, 118-і — 1 жасқа дейінгі сәби. Жетеуі — жүкті әйел.

Еске сала кетейік, бұдан бұрын Батыс Қазақстанда 2 мыңдай адамды ит пен мысық тістегенін жазған едік.