Батыс Қазақстандағы көпірдің басым бөлігі жөндеуді қажет етіп тұр

АСТАНА, 26 желтоқсан – Sputnik. Батыс Қазақстан облысында 36 көпірдің тек біреуінің ғана жағдайы жақсы, деп хабарлайды облыстық жолаушылар көлігі және автомобиль жолдары басқармасы.

Зерттеу нәтижелері бойынша аймақта апаттық өткелдер жоқ. Алайда көпірлердің көпшілігі 1968-1970 жылдары салынған және жөндеуді қажет етеді. Қанағаттанарлық жағдайда алты көпір бар, біреуінің жағдайы жақсы.

"2020 жылы Орал–Кирсаново жолындағы Быковка, Ембулатовка және Рубежка өзендерінің көпірінде күрделі жөндеу жұмыстары жүргізілді. 2025 жылы Переметное–Үлкен Шаған автожолындағы Деркөл өзені арқылы өтетін көпірге жөндеу жұмыстары аяқталды. Бұл жұмыстардың жалпы құны 1 миллиард 351 миллион 508 мың теңге болды", - дейді басқармада.

Сондай-ақ Аралтөбе өзені арқылы өтетін көпірге қайта жөндеу жұмыстары жүргізіліп, Солянка өзені арқылы өтетін көпірге күрделі жөндеу жұмыстары жалғасуда. Тасқала–Аққұрай–Болашақ–РФ шекарасы аудандық маңызы бар жолында Чижа өзені арқылы өтетін екі көпірді қайта жаңарту жобалары әзірленді.

Мына өзендер арқылы жаңа көпірлер салу жоспарлануда:

Утва өзені арқылы Ардақ - Ақтау жолында (Шыңғырлау ауданы, 58-60 км)

Қалдығайты өзені арқылы (Қаратөбе ауданы)

Қоржын кентінің жанындағы Жақсыбай өзені арқылы (Қаратөбе ауданы) өтетін көпір.

Осы жобаларды іске асыру үшін басқарма республикалық бюджеттен қаражат бөлуге өтінім жолдаған.