Бейбіт Жұқаев Оңтүстік Кореядағы турнирде бастапқы қарсыласын камбэкпен жеңді

Қазақстандық теннисші алғашқы айналымда құрдасы, АТР рейтингісінде 708-орында тұрған оңтүстіккореялық Юй Сун Пакпен бетпе-бет келді. 

Бірінші партия жергілікті спортшының есебіне жазылды – 6:4. Дегенмен бұдан кейін Бейбіт ойын тізгінін қолына алып, камбэк жасай білді – 6:4, 6:4.

Екі сағаттан астам уақытқа созылған тартысты бәсекеде Жұқаев 12 эйспен бірге 9 брейк-пойнттың тек екеуін ғана пайдаланды. Пак 12 эйс, 1 брейкпен (3 брейк-пойнт) көзге түсті. 

Бейбіт Жұқаев ширек финалға шығу үшін әлемнің 110-ыншы, осы жарыстың 3-ракеткасы, жапониялық Шо Шимабукуромен таласады. 

Қазақстандық теннисші осыған дейін Мексикадағы қос челленджер додасында ширек финалға дейін жетіп, екеуінде де жарыстың 1-ракеткасы, аустралиялық Джеймс Даквортқа жол берген еді. 

Соның нәтижесінде кеше жаңартылған әлемдік рейтингіде Бейбіт 340-тан 305-орынға көтерілді. Қазіргі кезде ATP Live рейтингісінде ол 297-сатыға шығып тұр. 

Еске сала кетейік, бұдан бұрын теннистен Қазақстан құрамасының әлемдік рейтингіде 7-орынға көтерілгенін жазған болатынбыз.