Бір миллион адамның айыппұлы кешіріледі заң қабылданды

АСТАНА, 3 маусым – Sputnik. Мәжіліс депутаттары қылмыстық және әкімшілік рақымшылыққа қатысты заңды қабылдады, деп хабарлайды Sputnik Қазақстан тілшісі.

Заңға сәйкес, азаматтарды айыппұл түріндегі әкімшілік жазадан толық босату қарастырылған. Олар:

Қазақстан азаматтары болып табылатын жеке тұлғалар;

жеке кәсіпкерлер;

жеке нотариустар;

жеке сот орындаушылары;

адвокаттар мен заң консультанттары.

Депутат Абзал Құспанның айтуынша, әкімшілік рақымшылық сот салған айыппұлдарға, сондай-ақ азаматтар мен мемлекеттің қауіпсіздігіне қатер төндіретін құқық бұзушылықтар үшін салынған айыппұлдарға қолданылмайды.

"Заң жобасында сонымен қатар рақымшылық қолданылмайтын әкімшілік құқық бұзушылықтардың тізбесі айқындалған",-деді Құспан мәжілістің жалпы отырысында.

Бас прокуратураның мәліметіне сәйкес, әкімшілік рақымшылық кезінде 21 млрд теңгенің 1,5 млн айыппұлы есептен шығарылады.

Депутат Абзал Құспанның айтуынша, олардың арасында бірнеше айыппұлды төлемей жүргендер де бар. Сондықтан әкімшілік рақымшылыққа шамамен 1 млн адам ілігеді.

Айта кетері, жаңа Конституцияның қабылдануына байланысты өткізілетін рақымшылықтың бұған дейінгі ізгілік шараларынан ерекшелігі сол, Қазақстанда тұңғыш рет қылмыстық рақымшылықпен қатар әкімшілік рақымшылық та жүзеге асырылады.