Биыл қар қалың түсе ме?

«Қазгидромет»  мамандары алдымыздағы қыс айларына консультативтік болжам жасап, алдағы апталардың ауа райы ауанына түсініктеме берді. Бұл туралы орталық директоры Марина Шмидт пен ұзақ мерзімді болжамдар басқармасының басшысы Жұлдыз Исабекова  баспасөз конференциясында тарқатып айтып берді, деп жазады Egemen.kz.

Фото: elorda.info.kz

Қыс – орташа жылы, бірақ құбылмалы болады

Болжамға сәйкес, алдағы қыс еліміздің көп өңірінде климаттық нормадан ауытқымаған, аса қатқыл емес мінез танытады. Жауын-шашын мөлшері орташа деңгейде сақталғанымен, қыс бойы жекелеген күндері боран, желдің күшеюі, мол қар, көктайғақ және тұман сияқты қолайсыз жағдайлар туындауы ықтимал. Қазгидромет мамандары мұндай құбылыстардың дер кезінде хабарланып отыратынын атап өтті.

Атланттық циклон әсері: жаңбыр, қар және көктайғақ

Жақын күндері Қазақстан аумағының басым бөлігінде ауа райының тұрақсыз сипаты сақталады. Бұған елімізге жылжи кірген кезекті атланттық циклон себеп болып отыр. Оның әсерінен жаңбыр мен қар түріндегі жауын-шашын күтіледі, солтүстік өңірлерде баяу жылдамдықтағы боран соғып, көктайғақ қалыптасуы мүмкін. Республика көлемінде жел күшейіп, түнгі мезгілдерде тұман жиілейді.

Тек оңтүстік-батыс өңірлерде, сондай-ақ 19–20 қараша күндері шығыс аймақтарда антициклон жотасының ықпалына байланысты жауын-шашынсыз күн райы болжанып отыр.

Температура айтарлықтай өзгермейді

Синоптиктердің айтуынша, алдағы күндері температуралық фон тұрақты сақталады. Тек шығыс өңірлерде түнде аяз 6–23 градусқа дейін төмендеп, күндіз ауа температурасы 2–10 градус жылылықты көрсетеді.

Қазгидромет мамандары қыс мезгіліне қатысты жаңартылған деректер мен егжей-тегжейлі болжамдар мекеменің ресми ресурстарында тұрақты жарияланып отыратынын хабарлады.