“Бизнес мүдделерін қорғайды“. Депутаттар экологиялық тексерулерге байланысты дауласты

Мәжілісте экологиялық бақылауға қатысты түзетулер бойынша пікірталас туындады. Депутат Азат Перуашев жаңа нормалар бизнеске қысымды күшейтуі мүмкін екенін мәлімдеді. Оның әріптесі Еділ Жаңбыршин адам өмірі басты басымдық болуы тиіс деп қарсы уәж айтты, деп хабарлайды Tengrinews.kz тілшісі.

Мәжілісте экологиялық бақылауға қатысты түзетулер бойынша пікірталас туындады. Депутат Азат Перуашев жаңа нормалар бизнеске қысымды күшейтуі мүмкін екенін мәлімдеді. Оның әріптесі Еділ Жаңбыршин адам өмірі басты басымдық болуы тиіс деп қарсы уәж айтты, деп хабарлайды Tengrinews.kz тілшісі.

Пікірталас Мәжілістің жалпы отырысында "Қазақстан Республикасының кейбір заңнамалық актілеріне экологиялық мәселелер бойынша өзгерістер мен толықтырулар енгізу туралы" заң жобасын бірінші оқылымда қарау барысында болды.

Перуашев бірқатар экологиялық түзетуді қолдайтынын, бірақ экологиялық бақылау шараларын Кәсіпкерлік кодексінен шығаруға және тексеру тәртібін өзгертуге қарсы екенін мәлімдеді.

Оның айтуынша, бұл бизнес пен тексерушілер арасындағы тепе-теңдікті бұзуы мүмкін.

"Тексеруші тексерілушіден де, заңнан да жоғары тұратын болады", - деді мәжілісмен.

Перуашев бұл жерде бизнеске түсетін әкімшілік жүктеменің артуы және кәсіпкерлерге құқықтық шеңберден тыс қысым жасалу қаупі туралы сөз болып отырғанын атап өтті.

"Мүмкін, ірі монополистерге, тау-кен, мұнай өндіру және мұнай өңдеу компанияларына қатысты қатаң бақылау шараларын қарастыруға болар. Бірақ бақылаудың кез келген түрін Кәсіпкерлік кодексі аясынан шығару іс жүзінде монополистермен және шикізат алпауыттарымен күрес емес, шағын және орта бизнеске қатысты озбырлыққа айналады", - деді ол.

Парламент мүшесі ірі компаниялардың заң бөлімдері мен халықаралық арбитражда қорғану мүмкіндігі бар екенін қадап айтты. Ал шағын және орта бизнес, оның сөзінше, ведомстволық озбырлық алдында дәрменсіз қалуы мүмкін.

"Ол қашан жұмыс істейді, өнім шығарады, мемлекетке салық төлейді?" - деп сұрақ қойды Перуашев.

Ол "Ақ жол" фракциясы бұл мәселе шешілмейінше заң жобасын қолдамайтынын айтты.

Бұған депутат Еділ Жаңбыршин жауап берді. Ол тексерулердің барлық кәсіпкерлерге емес, бірінші кезекте I және II санаттағы нысандарға - яғни зиянды шығарындылардың рұқсат етілген көлемі бойынша өздеріне міндеттеме алатын қауіпті нысандарға қатысты екенін мәлімдеді.

"Мұнда бизнестің мүддесін қорғайтын депутаттар бар. Онда айтыңыздаршы, неге бұл кәсіпорындар Кәсіпкерлік кодексінің талаптарын сақтамайды? Неге олар өз өндірісін жаңғыртпады? Неге заңнама талап еткендей заманауи технологияларды енгізбеді?", - деп сұрады Жаңбыршин.

Оның айтуынша, IV санаттағы шағын нысандарға, мысалы, шашлық сататын орындар мен моншаларға мұндай тексерулер жүргізілмейді.

Жаңбыршин төтенше жағдайлар кезінде мемлекет тексеруді келісудің барлық процедуралары өткенше бірнеше күн күтіп отыра алмайтынын жеткізді.

"Егер, мысалы, Атырау мұнай өңдеу зауытында төтенше жағдай болса - біз не, қол қусырып қарап отыруымыз керек пе? Немесе, мысалы, битум зауыты түнгі сағат 3-те орасан зор қалдық шығарса ше?" - деп мысал келтірді депутат.

Ол сондай-ақ экологиялық бұзушылықтардың адам денсаулығына зиян келтірген жағдайларын еске салды.

"Біз үшін басымдық бизнес те, пайда да емес. Біз үшін басымдық - адам өмірі. Әрине, тексеру керек", - деді Жаңбыршин.

Оның сөзінше, хабарлама беру барлық жағдайда жойылмайды - әңгіме апатты жағдайлар мен қоршаған ортаға қауіп төнген кезде жедел әрекет ету туралы болып отыр.

"Біз 3 күн күтуіміз керек пе? Бұл апатты шығарындылар, олар сол сәтте анықталуы тиіс", - деп түйіндеді ол.

Бұған дейін біз "Маңғыстаумұнайгаз" АҚ-қа 32 миллиард теңге айыппұл салынғаны туралы жазған болатынбыз. Маңғыстау облысы прокуратурасының мәліметінше, сөз ағынды суларды жер қойнауына төгу, бұрғылау қалдықтарын лимитсіз жинау және ластаушы заттарды нормадан тыс шығару туралы болған.

Сондай-ақ Атырау мұнай өңдеу зауытында мұнай өнімдерінің төгілгені хабарланған болатын. "ҚазМұнайГаз" сол кезде зауытта тауарлық автобензин компоненттерін айдау желісінде ақау анықталғанын, содан кейін құбыр резервуардан ажыратылғанын мәлімдеген еді.

Экологиялық бақылау мәселелері әсіресе экологиялық бұзушылықтар халықтың өмір сүру сапасы мен қауіпсіздігіне тікелей әсер ететін өнеркәсіптік және мұнай өндіруші аймақтар үшін өте сезімтал.

Тағы оқыңыз: "Мұнай - біздің бағымыз бен сорымыз": депутат табиғатты ластаушыларға салынатын айыппұлдар туралы пікір білдірді