Болашақ дипломаттар Қазақстанды зерттеуде

«Қазақстанның көпвекторлы сыртқы саясаты және Корея Республикасымен қатынастардың дамуы» тақырыбында еліміздің Сеулдегі Елшісі Нұрғали Арыстанов жоғары сынып оқушыларына дәріс оқыды. 

Дипломатпен кездесуге халықаралық қатынастарды зерттеп жүрген жастар лагерінің шамамен 80-ге жуық қатысушысы келді. Елші оларға Қасым-Жомарт Тоқаевтың жуырда «Turkistan» газетіне берген сұхбаты жайында ой өрбітті. Сосын дәріс қатысушыларына журналдар мен туристік жолсілтемелер таратылып, Қазақстанның көрікті жерлері туралы бейнеролик көрсетілді. Дәріс соңында Нұрғали Арыстанов жоғары сынып оқушыларының сұрақтарына жауап берді.

Нұрғали Арыстанов, Қазақстан Республикасының Корея Республикасындағы елшісі:

- Қазіргі уақытта Қазақстанда жасанды интеллектіге ерекше көңіл бөлініп жатыр. Корея президенті Ли Чжэ Мён да бұл бағытқа үлкен мән беріп отырғанын білеміз. Екі ел арасында бұл тұрғыда жақсы үндестік бар. Біз, тіпті Цифрлық даму және аэроғарыш өнеркәсібі министрлігін құрдық. Сонымен қатар Алматы маңында салынып жатқан болашақ қаласы – Алатау Сити жобасы бар. Алдағы жылдары біз «Ақылды қала» тұжырымдамасын дамытуға басымдық береміз.

Ли Чжон хун, Квачхон Қ. шет тілдер мектебінің оқушысы:

- Лагерь барысында біз елшілермен кездесіп, олардан сұхбат алып, осындай презентациялар жасаймыз. Мен дипломат болуды және болашақта Қазақстанда жұмыс істеуді армандаймын. Бұрын Қазақстан экономикасын онша түсінбейтінмін, ал бүгін оның ауқымы мен Қазақстан ынтымақтасатын елдер туралы көп мағлұмат алдым. Бұл мен үшін өте пайдалы тәжірибе болды.