БҚО да 149 жанұя Қаладан ауылға бағдарламасымен ауылға көшті

Батыс Қазақстан облысында кейінгі үш жылда 12 бастауыш мектеп жабылды. Бұл - оқушылар санының азаюына байланысты қабылданған шешім. Биыл да бір бастауыш мектеп таратылу тиіс еді. Алайда «Қаладан ауылға» бағдарламасы арқасында бұған жол берілмеді. 149 жанұя шаһардан ауылға қоныс аударды. 

25 түтіні бар Оразғали ауылы биыл екі отбасымен толықты. Бес баланың анасы Сәуле Рушанова бұған дейін Оралда тұрған. Алайда басыбайлы баспанасы болмағандықтан пәтер жалдап келді. Содан «Қаладан ауылға» бағдарламасы туралы естіп, тәуекелге бел буды. Қазір отағасы жергілікті шаруа қожалықта механизатор. Өзі әзірге бала күтімімен үйде отыр.

Сәуле Рушанова, Оразғали ауылының тұрғыны:

- Пәтерде тұрдық, қиындау болды. Бес баламыз бар, үлкен қызымыз студент. Оралда оқып жатыр. Қалғандары мектепте, балабақшада. Басында қиын болды ғой, үйрене алмай. Сосын жайлап үйренісіп кеттік. Өзіміз де ауылдан шыққан баламыз ғой. Ауыл жақсы. Ұйымшыл. Мақтан етемін. Осы ауылға көшіп келгеніме өте қуаныштымын. 

Ауылда мәдениет үйі, фельдшерлік пункт, шағын орталық, кітапхана бар. Алайда солардың ішінде ең маңыздысы - бастауыш мектеп деп санайды тұрғындар.  Қазір мұнда 10 оқушы білім алады. Көшіп келген жанұялардың арқасында бала саны да көбейген.

Қолғанат Әдиетов, Оразғали ауылының тұрғыны:

- Егер де мектеп жабылатын болса, ауылдағы жұмыс жасап отырған адамдардың бәрі қалаға көшеді. Ауыл құлазып қалады.  Жаңадан үй салып, ауылымызға екі тұрғын алып келді 5-5 баладан,  10 бала. Екі отбасыға үш ірі қара мал бұзауымен, он шақты қой-ешкісімен беріп, ауылға келіп, қоныстандырып жатырмыз. 

Серік Қайырлиев, Казталов ауданы әкімінің орынбасары:

- Ауданымызда өткен жылы тоғыз елді мекенде 19 отбасы көшіп келген болатын, жалпы 108 адам. Биылғы жылы 19 ауылдық елді мекен таңдап алынып, соның 12-не 129 адам көшіп келу жоспарлануда. Қазір сегіз отбасы көшіп келіп, 34 адам ауылға қоныс тепкен. Барлығы тегін үймен қамтылып, жұмысқа қабілетті азаматтарға жұмыс тауып беру бағытында жұмыс жүріп жатыр.

Өңірде былтыр 104 жанұя, яғни 509 адам қаладан ауылға қоныс аударды. Ал биыл әзірге 45 жанұя көшіп келді. Оларға әкімдік үй салып береді. Жұмыспен қамтып, мал алып береді. Негізгі таңдау шекара маңындағы елді мекендерге түседі.

Райса Еркеғалиева, Стратегия және экономикалық даму басқармасының бөлім басшысы: 

- Шекара маңындағы ауылдарды сақтап қалуымыз керек. Олардың стратегиялық маңызы зор. Сол мақсатта биыл «Қаладан ауылға» бекітілген ауылдар тізбесі облыс әкімінің қаулысымен кеңейтілді. 2024 жылы 57 ауылдық елді мекен белгіленсе, биыл 96 елді мекен көшіп келушілерді қабылдайды. Жоба 24-26 жылдарға жасақталғандықтан жыл сайын өңіріміздің 12 ауданына кем дегенде 10 жанұядан көшіру жоспарланып отыр. 

Жалпы облыста 405 ауылдық елді мекен болса, соның 145-і шекара сызығынан 50 шақырымнан аспайтын қашықта орналасқан.

Авторлары: Е. Жылқайдарұлы, Б. Жарылғасов, Э.Аюпов