Бұл өткенге сағыныш емес, сабақтастықты сақтау Президент Құрылтайдың жаңғыруы туралы

Президент Қасым-Жомарт Тоқаев Қазақстанның жаңа парламентіне "Құрылтай" атауының қайтарылуы Ұлы даланың тарихи дәстүрлерімен байланысты екенін мәлімдеді. Оның айтуынша, реформа елдің саяси мұрасын қазіргі басқару жүйесімен ұштастыруы тиіс, - деп хабарлайды Tengrinews.kz Ақордаға сілтеме жасап.

"Реформаның арқасында тарихи тамыры тереңде жатқан Құрылтай ұғымы қайта жаңғырды. Ата-бабамыз ел тағдыры шешілетін сындарлы сәттерде Құрылтай шақырған. Мысалы, Талас құрылтайы алып империя – Алтын орданың құрылуына себепкер болды. Ал Ордабасы құрылтайы қиын-қыстау кезеңде барша қазақты бір байрақтың астына жинады", - деді Президент.

Президенттің сөзінше, бұл ұғым Ұлы даладағы парламентаризм институтының жылнамасы тереңде екенін айғақтайды.

"Сондықтан заң шығарушы органға Құрылтай деген атау бердік. Бұл – өткенді көксеу емес. Бұл – тарихи сабақтастықты сақтау, саяси дәстүрді заманауи басқару жүйесімен ұштастыру деген сөз. Құрылтай ұғымы халқымыздың өткенін, бірегей болмысын және жарқын болашаққа деген ұмтылысын айшықтайды. Біз өскелең ұрпақтың игілігі үшін ынтымағы жарасқан, Заң мен тәртіп үстемдік құрған Әділетті, Қауіпсіз, Таза және Күшті Қазақстанды құрып жатырмыз. Алда ауқымды жұмыс күтіп тұр. Сіздер осы миссияны іске асыруға белсене атсалысып, ең алдымен ұлттың, жалпы халықтың мүддесіне адал қызмет етесіздер деп сенемін", - деді Мемлекет басшысы.

Google News арқылы жаңалықтарымызды қадағалаңыз