БҰҰ Қауіпсіздік кеңесі Судандағы жедел әрекет ету күштерінің командирлеріне санкция салды

Inform.KZ парақшасынан алынған ақпаратқа сүйене отырып, Qazaq24.com хабарлама жасады..

Баспасөз баянында Судан бойынша 2005 жылғы 1591-қарар негізінде құрылған Қауіпсіздік Кеңесінің комитеті БҰҰ Жарғысының VII тарауына сәйкес енгізілген шектеу шараларына жататын тұлғаларды санкциялық тізімге қосуға келісім бергені көрсетілген.

Шектеу шаралары ЖӘК жетекшісінің орынбасары Абдель Рахим Хамдан Даглоға қатысты енгізілді. Сондай-ақ Жедел әрекет ету күштерінің командирлері Гедо Хамдан Ахмед Мухаммед, Альфатех Абдулла Идрис Адам және Тиджани Ибрагим Муса Мухаммед те санкцияға ілікті.

Санкциялар активтерді бұғаттауды және сапарларға тыйым салуды көздейді. Ұсынысты Ұлыбритания, АҚШ және Франция 2005 жылы қабылданған 1591-қарарға сүйене отырып енгізген. Аталған құжат Суданның Дарфур өңіріне қару-жарақ жеткізуге эмбарго жариялауды қарастырады.

Судандағы қақтығыс және жедел әрекет ету іүштерінің әрекеттері

2023 жылғы 15 сәуірден бері Судан аумағында ұлттық армия мен сыртқы қолдауға ие Жедел әрекет ету күштері арасында қиян-кескі қақтығыстар жалғасып келеді.

Бұл қарулы текетірес әлемдегі ең ауыр гуманитарлық дағдарыстардың біріне айналып, ондаған мың адамның өмірін жалмады әрі шамамен 13 миллион адамның қоныс аударуына себеп болды.

Қазіргі таңда ЖӘК елдегі 18 штаттың бесеуінің орталықтарын бақылауда ұстап отыр. Ал Судан армиясы қалған 13 штатта, соның ішінде оңтүстік, солтүстік, шығыс және орталық аймақтарда, сондай-ақ астана Хартумда билікті сақтап отыр.

Осыған дейін Суданда соңғы екі айда 50 мыңнан астам адам үйін тастап кетуге мәжбүр болғаны туралы жаздық.

Маңызды жаңалықтар мен жаңартуларды өткізіп алмау үшін Qazaq24.com сайтын қадағалаңыз.