Былтыр елімізде 236 мың оқушыға арналған 162 мектептің құрылысы аяқталды

2025 жылдың қорытындысы бойынша елімізде 236 мың оқушы орнына арналған 162 мектептің құрылысы аяқталып, пайдалануға берілді, – деп хабарлайды Aikyn.kz сайты.

Олардың ішінен 112 мектеп Мемлекет басшысының бастамасымен іске асырылып жатқан "Келешек мектептері" ұлттық жобасы аясында салынды. Аталған жобаның мақсаты – білім беру инфрақұрылымын жаңғырту және оқушы орны тапшылығын жүйелі түрде шешу.

Жаңадан ашылған мектептер 27 үшауысымды және 11 апатты мектептің мәселесін шешуге, сонымен қатар 160 мыңнан астам оқушы орны тапшылығын жоюға мүмкіндік берді. Құрылыс жұмыстары бюджет қаражаты мен инвестициялар есебінен жүргізілді.

"Келешек мектептері" аясында пайдалануға берілген 112 мектептің 40%-дан астамы ауылдық жерлерде орналасқан. Ал 2024 жылдың қорытындысы бойынша 254 мың оқушы орнына арналған 105 мектеп іске қосылған еді.

Сонымен қатар, Білім беру инфрақұрылымын қолдау қоры есебінен 89 мың оқушыға арналған 81 мектеп салынды. Олардың ішінде 2025 жылы 13 мың оқушыға арналған 18 жаңа мектеп іске қосылды.

Қайтарылған активтер есебінен де бірқатар білім нысандары бой көтерді:

- Ұлытау облысының Қаражал қаласы мен Маңдырай станциясында — 2 мектеп;

- Солтүстік Қазақстан облысында — 1 балабақша.

Арнайы мемлекеттік қор қаражаты арқылы 8 нысан қаржыландырылды:

- 5 мектеп,

- 2 балабақша,

- 1 жатақхана.

Қосымша қаражаттар мен инвестициялар есебінен 16 мың оқушы орнына арналған 30 мектептің құрылысы жүргізілуде.

- 209 мектеп реновация бағдарламасы аясында жаңартылды;

- 1 000 ауыл мектебі заманауи стандарттарға сай жаңғыртылды;

- Ауыл мектептері үшін 1 196 заманауи пән кабинеті сатып алынды.

Жаңа білім беру нысандарының ашылуының нәтижесінде Астана, Алматы, Шымкент қалаларында, сондай-ақ Қарағанды және Қызылорда облыстарында үшауысымды оқыту мәселесі толығымен шешілді.