БЖЗҚ: Айына 300 мың теңге зейнетақы алу үшін тұрақты жарна қажет

Бірыңғай жинақтаушы зейнетақы қоры қазақстандықтардың болашақта айына 300 мың теңге немесе одан жоғары зейнетақы алуына қандай шарттар қажет екенін түсіндірді.

Қордың болжамынша, 2040 жылдардың басында еңбек жолын 1998 жылдан кейін бастаған азаматтар зейнетке шыға бастайды. Бұл буын ынтымақты зейнетақы жүйесінің төлемдерін алмайтын, тек жеке жинақтары мен базалық төлемге сүйенетін ұрпақ болады.

Халықаралық еңбек ұйымы стандарттарына сәйкес, зейнеткерлік төлемдер адамның бұрынғы жалақысының кемінде 40 пайызына тең болуы тиіс. Осы деңгей сақталса, зейнетке шыққаннан кейін өмір сүру сапасы күрт төмендемейді.

БЖЗҚ мәліметінше, айына шамамен 300 мың теңге зейнетақы алу үшін басты шарт – жүйелі жарна аудару. Яғни салымшы еңбек жолы бойы жылына 12 рет тұрақты зейнетақы жарнасын жасап отыруы қажет. Орташа жалақы мен тұрақты аударымдар болған жағдайда базалық зейнетақы, жеке жинақтар және жұмыс беруші жарналары бірігіп, шамамен 40 пайыздық алмастыру коэффициентін қамтамасыз етеді.

Қор мамандары зейнетақы жинақтарын тұрғын үй сатып алу немесе емделу мақсатында мерзімінен бұрын алу болашақтағы төлемдердің азаюына әкелуі мүмкін екенін ескертті.

Олардың айтуынша, ең төменгі жеткіліктілік шегі тек ең төменгі зейнетақыны қамтамасыз етуге есептелген. Сондықтан бүгін алынған әрбір қаражат болашақтағы зейнетақы мөлшеріне әсер етеді.

Қазақстан Ұлттық Банкі төрағасы Тимур Сүлейменов те лайықты зейнетақы алу үшін табыс алмастыру коэффициентін арттыру қажет екенін айтты. Оның сөзінше, бұл үшін жинақты мерзімінен бұрын алу талаптарын қатаңдату мәселесі қарастырылуы мүмкін.