БЖЗҚ дан 46 млрд теңге жымқырған: Жалған стоматологиялардың бір иесі ұсталды

Әңгіме Аслан Дүйсенов туралы болып отыр. Тергеу деректері бойынша, оның кінәсі толық дәлелденген.

– Біріншіден, оның процессуалдық мәртебесі – «күдікті». Оған сырттай айыптау тағылып, сот бұлтартпау шарасы ретінде қамауға алу туралы шешім шығарды және іздеу жарияланған болатын. Қазіргі уақытта күдікті ұсталды, сот санкцияны растады. Тергеу барысында оның төрт клиника ашуға қатысы бары, сондай-ақ заңсыз әрекеттер арқылы алынған қаражаттың толық көлемі дәлелденді, – деді Қаржылық мониторинг агенттігі төрағасының орынбасары Жеңіс Елемесов Сенат кулуарында.

Бұған дейін агенттік жалған стоматология ашқан А.Қ. Дүйсеновке, Ғ. Иманбаевқа және Е.Б. Елеушевке іздеу жариялаған болатын.

Олар 46 млрд теңгеден астам қаражатты БЖЗҚ заңсыз шығару мақсатында қылмыстық схемаларды ұйымдастырды деген күдікке ілінген. Бұл мақсатта олар тіс емдеу қызметі көрсетілгендей жалған медициналық құжаттарды рәсімдеген. Олар Маңғыстау және Атырау облыстарындағы 7 стоматологиялық клиниканы пайдаланған. Аталған мекемелер іс жүзінде ешқандай медициналық қызмет көрсетпеген.

Ал «Отбасы банк» пен Денсаулық сақтау министрлігі бірыңғай жинақтаушы зейнетақы қорынан азаматтардың жинағының бір бөлігін тіс емдеуге алуға шектеу қоюды ұйғарды.