Дәуірдің соңы Тим Кук бірнеше күннен кейін Apple басшысы қызметінен кетеді

Тим Кук Apple компаниясын басқарған 15 жылдық кезеңін аяқтайды. 1 қыркүйектен бастап компанияны ресми түрде Apple компаниясының қазіргі аппараттық инженерия бөлімінің басшысы Джон Тернус басқарады. Бұл ретте Кук компаниядан кетпейді: ол директорлар кеңесінің атқарушы төрағасы болады, деп хабарлайды Tengri Life MacRumors сайтына сілтеме жасап.

Apple басшылығының алдағы ауысуы туралы сәуір айында жариялаған болатын. Енді ресми ауысуға санаулы күндер қалды.

Тим Кук немен есте қалды?

Кук 2011 жылдың тамызында Стив Джобстың орнына келіп, Apple тізгінін ұстады. Тағайындалғаннан кейін қызметкерлерге жолдаған алғашқы үндеулерінің бірінде ол Джобс қалыптастырған компания мәдениеті мен принциптерін сақтауға уәде берді.

"Мен сіздердің Apple өзгермейтініне сенімді болғандарыңызды қалаймын. Мен Apple-дің бірегей принциптері мен құндылықтарын жоғары бағалаймын және қастерлеймін. Стив әлемде теңдесі жоқ компания мен мәдениет құрды, біз соған адал болып қаламыз – бұл біздің ДНҚ-мызда. Біз тұтынушыларымызды қуантатын және қызметкерлерімізді өз жұмысына керемет мақтанышпен қарататын әлемдегі ең үздік өнімдерді жасауды жалғастыра береміз", - деген болатын Кук 2011 жылы.

Оның басшылығымен Apple көптеген айтулы өнім мен технологияларды шығарды. Осы уақыт ішінде iPhone желісі iPhone 4s-тен iPhone 17-ге дейінгі жолды жүріп өтті, ал құрылғыларда үлкен экрандар, Face ID және "кекіл" (notch), бірнеше камера, Dynamic Island және USB-C пайда болды.

Куктың тұсында Apple Apple Watch, AirPods, HomePod және Vision Pro құрылғыларын ұсынды.

Тим Кук немен айналысады?

CEO қызметінен кеткеннен кейін Кук Apple директорлар кеңесінің атқарушы төрағасы болады.

Ол істен толықтай қол үзуді жоспарлап отырған жоқ. Apple мәлімдемесіне сүйенсек, Кук компания жұмысының жекелеген бағыттарына қатысуды, соның ішінде әртүрлі елдердің билік өкілдерімен өзара іс-қимыл жасауды жалғастырады.

Куктың өзі бұған дейін Apple-дің атқарушы төрағасы лауазымында ұзақ уақыт қалуды жоспарлап отырғанын айтқан болатын.

Джон Тернус деген кім?

Жаңа CEO Джон Тернус болады. Ол 51 жаста, ал Apple компаниясында 2001 жылдан бері жұмыс істейді.

Тернус жұмысын Product Design командасында бастап, 2013 жылдан бастап аппараттық инженерия жөніндегі вице-президент қызметін атқарды. 2021 жылы ол аға вице-президент болып, Hardware Engineering бағытын басқарды.

Оның басшылығымен iPhone, iPad, Mac, AirPods және Apple-дің басқа да өнімдерінің аппараттық бөлігімен айналысатын командалар жұмыс істеді. Ол сондай-ақ Mac компьютерлерін Apple-дің жеке процессорларына көшіруде маңызды рөл атқарды.

Жаңа iPhone презентациясы қашан өтеді?

Басшының ауысуы Apple-дің дәстүрлі күзгі презентациясының қарсаңында болады. Қолда бар мәліметтер бойынша, іс-шара 9 қыркүйек күні Астана уақытымен 22:00-де өтеді.

Онда iPhone 18 желісінің таныстырылымы күтіледі, ал басты тосынсый Apple-дің алғашқы жиналмалы смартфоны болуы мүмкін.

Google News арқылы жаңалықтарымызды қадағалаңыз

Жазылу