Денсаулық сақтау министрлігі ата аналарға балалардың мектеп рюкзактары туралы ескертті

Денсаулыққа қатысты мәселелердің алдын алу үшін мектеп рюкзагы қандай болуы керек және оны оқу жылы алдында қалай дұрыс таңдау қажеттігі туралы Денсаулық сақтау министрлігі айтты, деп хабарлайды Tengri Health.

Дұрыс салмақ формуласы: сыныптар бойынша норма

Ата-аналарға негізгі бағдар - ішіндегі заттарымен жиналған рюкзактың салмағы баланың дене салмағының 10 пайызынан аспауы тиіс, деп түсіндірді Денсаулық сақтау министрлігі.

Мысалы, оқушының салмағы 30 келі болса, рюкзак ішіндегі барлық затпен қоса 3 келіден аспауы керек.

Денсаулық сақтау министрлігінің бұйрығына сәйкес, мектеп сөмкесінің өзін есептемегенде, оқулықтар мен дәптерлердің күнделікті жиынтығы үшін рұқсат етілген салмақ нормалары мынадай:

1–3 сыныптар: 2 келіге дейін; 4–5 сыныптар: 2,5 келіге дейін; 6–7 сыныптар: 3,5 келіге дейін; 8–11 сыныптар: 4,5 келіге дейін. Не нәрсеге назар аудару керек?

Бос рюкзактың өзі барынша жеңіл - мүмкіндігінше 1 келіден ауыр болмауы тиіс, деп атап өтті министрліктегілер.

"Мамандар мектеп рюкзагын баламен бірге таңдауға кеңес береді. Сатып алмас бұрын рюкзакты баланың арқасына салып көріп, оқушының бойына сәйкес келетініне және арқасына ыңғайлы орналасатынына көз жеткізген жөн", - делінген хабарламада.

Дұрыс таңдалған рюкзак:

омыртқаға дұрыс тиюі үшін тығыз ортопедиялық арқалығы бар; иыққа түсетін жүктеме біркелкі бөлінуі үшін ұзындығы реттелетін кең әрі жұмсақ баулары бар; қараңғы уақытта баланың қауіпсіздігін қамтамасыз ету үшін жарық шағылыстыратын элементтері бар; төзімді және ылғал өткізбейтін материалдан жасалған.

"Рюкзактың өз салмағын да ескерген маңызды. Ол неғұрлым жеңіл болса, балаға түсетін қосымша жүктеме де соғұрлым аз болады. Мамандар бос рюзактың салмағы 1 келіден аспауын ұсынады. Рюкзак бала үшін тым үлкен болмауы және белден айтарлықтай төмен түсіп тұрмауы тиіс", - деп түсіндірді ДСМ өкілдері.

Рюкзактағы артық заттардан арылыңыз

Ең жақсы рюкзактың өзі, бала оның ішінде қажеті жоқ көптеген затты тасыса, тым ауыр болуы мүмкін. Сондықтан ата-аналарға оның ішін тексеріп тұруға кеңес беріледі.

Ойыншықтарды, артық кітаптарды, дәптерлерді және сабаққа қажеті жоқ басқа да заттарды үйде қалдырған дұрыс.

Салмақ біркелкі бөлінуі үшін баланы рюкзакты екі иығына бірдей тағуға үйрету маңызды, деп атап өтті Денсаулық сақтау министрлігі.

Егер мектепте шкаф немесе сақтауға арналған басқа орын болса, оқулықтар мен құралдардың бір бөлігін сонда қалдыру ұсынылады.

Ыңғайлы рюкзак:

"баланың бойына сәйкес келеді, артық заттар барынша аз және салмағы оқушы салмағының 10 пайызынан аспайды. Осындай қарапайым күнделікті әдеттер баланың оқу күндерін жайлы етуге және арқа мен иыққа түсетін артық жүктемені азайтуға көмектеседі", - деп түйіндеді ДСМ.

Бұған дейін Қазақстанда оқушыларды бағалау ережесін өзгерту ұсынылғаны туралы жазған болатынбыз. Оқу-ағарту министрлігі бұйрық жобасын дайындады, оған сәйкес бастауыш сыныптарда үйреншікті БЖБ мен ТЖБ-дан бас тартылуы мүмкін.

Google News арқылы жаңалықтарымызды қадағалаңыз

Жазылу

дсм

Денсаулық

Қазақстан

Мектеп