Депутат жаңа ипотекалық бағдарламаны іске қосуды талап етті

АСТАНА, 26 қараша – Sputnik. Мәжілісте мүгедек жандар үшін тиімді ипотекалық бағдарламаны іске қосу мәселесі көтерілді, деп хабарлайды Sputnik Қазақстан тілшісі.

Депутат Ерлан Әбдиевтің айтуынша, бүгінде мүгедек жандар тұрғын үйді кезек тәртібімен өтеусіз алуға құқылы. Алайда бір жылдың ішінде бар болғаны 605 пәтер беріледі. Бұл кезектегі қажеттіліктің 1,1 процентін ғана жабады. Бүгінде кезекте тұрғандардың саны 61,4 мың адамға жетті.

"Яғни берілетін тұрғын үй көлемі артса да, кезек қысқармай, керісінше ұлғайып отыр, бұл қолданыстағы тетіктердің жүйелі түрде мәселені шешуге жеткіліксіз екенін көрсетеді", - деді Әбдиев мәжілістің бүгінгі отырысында.

Ал қазіргі ипотекалық бағдарламалар мүгедек азаматтардың қажеттіліктері мен мүмкіндіктерін ескермейді. Мәселен "Наурыз" бағдарламасының жылдық мөлшерлемесі тиімсіз. "Бақытты отбасымен" төлем қабілеттілігі расталса да, қалаған ауданнан және қалаған құрылыс салушыдан үй таңдау құқығы жоқ. Оған қоса, банктер қарыз жүктемесін зейнетақы аударымдары арқылы есептейді. Ал мүгедек азаматтар заң бойынша міндетті зейнетақы жарналарынан босатылған. Содан формалды түрде "төлем жасауға қабілетсіз" болып жатады.

"Осыған байланысты мүгедек жандарға және мүгедек баланы тәрбиелеп отырған отбасыларға арналған 2% жылдық мөлшерлемемен, 10% бастапқы жарнамен, 19 жылдық мерзіммен "Наурыз Инклюзия" жаңа ипотекалық бағдарламасын енгізу мүмкіндігін қарастыруды сұраймыз", - деп атап өтті Әбдиев.

Сондай-ақ, оның айтуынша, мүгедек жандар үшін қарыз жүктемесі коэффициентін есептеу тәртібіне өзгерістер енгізу керек.